1 րոպեի ընթերցում
ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ։ Թուրքիայի նախագահ Ռեջեփ Թայիփ Էրդողանը Իտալիայի վարչապետ Ջորջիա Մելոնիի հետ հեռախոսազրույցի ժամանակ հայտարարել է ՄԱԿ-ում Անկարայի նախաձեռնության մասին՝ Իսրայելին զենքի էմբարգոյի սահմանման վերաբերյալ, և ընդգծել է Հռոմի աջակցության կարևորությունը։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտնել են Թուրքիայի ղեկավարի գրասենյակից։
«Նախագահ Էրդողանն ասել է, որ Իսրայելն ընդլայնել է կրակի շրջանակը Մերձավոր Արևելքում՝ անտեսելով բոլոր նախազգուշացումները։ Նախագահի կարծիքով՝ կարևոր է, որ միջազգային հանրությունը միասին գործի Իսրայելի ագրեսիան դադարեցնելու համար, և որ Իտալիայի աջակցությունը ՄԱԿ-ում Թուրքիայի նախաձեռնությանը նույնպես շատ կարևոր է»,- ասված է գրասենյակի հաղորդագրության մեջ։
Էրդողանը ավելի վաղ հանդես էր եկել ՄԱԿ-ի մակարդակով Իսրայելին զենք մատակարարելու էմբարգո մտցնելու նախաձեռնությամբ։