3 րոպեի ընթերցում
ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ։ Միավորված ազգերի կազմակերպության Եվրոպայի տնտեսական հանձնաժողովի (ԵՏՀ) քաղաքաշինության, բնակարանաշինության և հողի կառավարման կոմիտեն միաձայն հաստատել է ՀՀ-ում աշխարհի թվով 9-րդ կենտրոնի ստեղծման որոշման նախագիծը, որն ընդունվել է ՄԱԿ-ի ԵՏՀ-ի քաղաքաշինության, բնակարանաշինության և հողի կառավարման կոմիտեի 85-րդ նստաշրջանում։ «Արմենպրես»-ին այս մասին հայտնեց ՃՇՀԱՀ-ի մամուլի քարտուղար Ժասմեն Վիլյանը։
Կոմիտեն աջակցություն է հայտնել հողի արդյունավետ կառավարման, կլիմայական առումով չեզոք շենքերի, խելացի և կայուն քաղաքների ուղղությամբ երկրների փորձի փոխանակման կազմակերպման հարցերում:
ՄԱԿ-ի հրավերով Ճարտարապետության և շինարարության Հայաստանի ազգային համալսարանի (ՃՇՀԱՀ) և քաղաքաշինության կոմիտեի պատվիրակությունները մասնակցել են Շվեյցարիայի Ժնև քաղաքում ՄԱԿ-ի ԵՏՀ քաղաքաշինության, բնակարանաշինության և հողի կառավարման կոմիտեի նստաշրջանին։ ՃՇՀԱՀ-ի պատվիրակությունը գլխավորել է համալսարանի ռեկտորի ժ/պ, ֆիզմաթ գիտությունների դոկտոր Մանուկ Բարսեղյանը։
ՃՇՀԱՀ-ի ռեկտորի ժ/պ Մանուկ Բարսեղյանը գլխավոր ամբիոնից ելույթով է հանդես եկել՝ ներկայացնելով ոլորտում համալսարանի ձեռքբերումներն ու հնարավորությունները։ Մասնավորապես, նա կարևորել է բարձր տեխնոլոգիաների կիրառմամբ խելացի և կայուն քաղաքների ստեղծման ու զարգացման գործընթացը, կրթություն-գիտություն համընթաց զարգացումը, ուսանողների ներգրավվածությունը գիտական ծրագրերում, նախագծերում և շեշտել, որ գիտության և հետազոտության զարգացումը որակյալ կրթության հիմնասյունն է։
Նստաշրջանի մասնակիցները բարձր են գնահատել համալսարանում իրականացվող աշխատանքները։ Ի աջակցություն ՀՀ-ում ստեղծվող կենտրոնի՝ ելույթներով հանդես են եկել աշխարհում գործող ութ գերազանցության կենտրոնների պատասխանատուները։
Հայաստանի գերազանցության կենտրոնը առաջինն է լինելու տարածաշրջանում և կարևոր դեր է ունենալու ոլորտային հետազոտությունների իրականացման, ՄԱԿ-ի ԵՏՀ-ի անդամ պետությունների հետ համագործակցության զարգացման, համալսարանում գիտական և կրթական բարեփոխումների շարունակականության ապահովման գործում։
Ելույթով հանդես է եկել նաև ՃՇՀԱՀ ՇՆՊԿԱ ամբիոնի վարիչի ժ/պ Ավետիք Արզումանյանը և ներկայացրել համալսարանի ուսումնագիտափորձարարական բազան և գերազանցության կենտրոնի ստեղծման, ինչպես նաև գործունեության տեսլականը։