Առաջին ռեզիդենտ ընկերությունը՝ Ինժեներական քաղաքի երկրորդ հատվածում. Մխիթար Հայրապետյանը մասնակցել է բացման արարողությանը

ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ բարձր տեխնոլոգիական արդյունաբերության նախարար Մխիթար Հայրապետյանը հոկտեմբերի 2-ին այցելել է Ինժեներական քաղաք, որտեղ «Հայաստան - Ճարտարագիտական շաբաթ 2024»-ի շրջանակում անցկացվող միջոցառումներին զուգընթաց տեղի է ունեցել ևս մեկ կարևոր իրադարձություն՝ Ինժեներական քաղաքի երկրորդ հատվածում բացվել է նոր ռեզիդենտ ընկերություն՝ Haylink Technology-ն։

Ինչպես «Արմենպրես»-ին տեղեկացրին ՀՀ բարձր տեխնոլոգիական արդյունաբերության նախարարությունից, նախարարին դիմավորել են «Ձեռնարկությունների ինկուբատոր» հիմնադրամի (EIF) տնօրեն Բագրատ Ենգիբարյանը, Ինժեներական ասոցիացիայի նախագահ Արամ Սալաթյանը, Haylink Technology -ի տնօրեն Գագիկ Էվոյանը, ովքեր նախարարի գլխավորությամբ ազդարարել են Haylink Technology-ի հանդիսավոր նորամուտը Ինժեներական քաղաք՝ կտրելով կարմիր ժապավենը։

Ներկայացնելով ընկերության գործունեությունը, տեսլականն ու ապագա ծրագրերը՝ Գագիկ Էվոյանը նշել է, որ մասնագիտացած են նորագույն հավելվածների, անվտանգության գործիքների (PKI, IPSEC, PKCS), ցանցային պրոտոկոլների (TCP/IP), իրական ժամանակում գործող ներկառուցված համակարգերի և անլար ու շարժական սարքերի հաղորդակցության համակարգերի մշակման մեջ։

Այնուհետև Մխիթար Հայրապետյանը շրջել է նորաբաց ընկերությունով, ծանոթացել աշխատանքային պայմաններին, զրուցել աշխատակիցների հետ։

Ըստ աղբյուրի՝ բացման արարողությանը մասնակցել են նաև այլ բարձրաստիճան պաշտոնյաներ, ոլորտի ներկայացուցիչներ, պատվավոր հյուրեր։

Այցի ընթացքում նախարար Մխիթար Հայրապետյանը շրջայց է կատարել Ինժեներական շաբաթվա 2-րդ օրվա ընթացքում բացված ցուցահանդեսով, ծանոթացել ներկայացված 17 ինժեներական ընկերությունների արտադրանքին ու ձեռքբերումներին։ Ընկերությունների ներկայացուցիչները նախարարին մանրամասներ են ներկայացրել իրենց գործունեության վերաբերյալ, անդրադարձ է կատարվել պետություն-մասնավոր համագործակցությանը։

Մխիթար Հայրապետյանը պատրաստակամություն է հայտնել առանձին ձևաչափով հանդիպումներ ունենալ՝ քննարկելու համագործակցության հնարավորությունները, լսելու առաջ քաշված խնդիրները և աջակցելու դրանց լուծման գործընթացում:

Նշվում է, որ նախարարին են ներկայացվել նաև Ինժեներական քաղաքում իրականացվող կրթական ծրագրերը՝ «Բագրևանդ 21-ը», «Էլեկտրոնային սարքեր և չափիչ համակարգեր» բակալավրիատի ծրագիրը, «Ավիատիեզերական սարքաշինություն» մագիստրոսական ծրագիրը, ավագ դպրոցի աշակերտների համար նախատեսված ծրագիրը և «Առաջադեմ հետազոտությունների կենտրոն» ծրագիրը։