Օրենքի նոր նախագիծը գրավիչ միջավայր կստեղծի ռազմաարդյունաբերող ընկերությունների համար. ԲՏԱ նախարար
2 րոպեի ընթերցում
ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ բարձր տեխնոլոգիական արդյունաբերության նախարարության կողմից մշակված ռազմարդյունաբերական համալիրի մասին օրենքի նախագիծը կառավարության կողմից հավանություն է ստացել, այն շուտով մանրամասն կներկայացվի Ազգային ժողովում:
«Արմենպրես»-ի հաղորդմամբ՝ այս մասին Համաշխարհային հայկական գագաթնաժողովի ընթացքում ասաց ՀՀ բարձր տեխնոլոգիական արդյունաբերության նախարար Մխիթար Հայրապետյանը՝ նշելով, որ այն կարգավորելու է երեք կողմերի՝ ՀՀ բարձր տեխնոլոգիական արդյունաբերության, ՀՀ պաշտպանության նախարարության և մասնավոր հատվածի իրավահարաբերությունները:
Ըստ նրա՝ այս կարգավորումները միտված են համապատասխան գրավիչ միջավայր ստեղծելու ռազմարդյունաբերող ընկերությունների համար:
«Շատ հաճախ դեռևս Խորհրդային միության ժամանակներից մնացած որոշակի քաղաքականություններ գալիս են ինչ-որ իմաստով զսպելու զարգացումը, հետևաբար՝ ՀՀ բարձր տեխնոլոգիական արդյունաբերության նախարարության առաքելությունն է վեր հանել և գնահատել այն խնդիրները, որոնք խոչընդոտում են զարգացմանը:
Այստեղ առաջին հերթին քաղաքականության և օրենքների նոր փաթեթների մշակումն է, որոնցից կարևորագույնը, որ մենք այս վերջին ժամանակաշրջանում իրականցրել ենք՝ ռազմաարդյունաբերական համալիրի մասին օրենքի նախագիծն է, որին կառավարությունն արդեն դրական եզրակացություն տվել է, և ես այն շուտով մանրամասն կներկայացնեմ Ազգային ժողովում»,- ասաց Հայրապետյանը:
Նա ընդգծեց՝ այս փաթեթով նաև լուծում են երկրորդ խնդիրը. զգալիորեն կրճատվում են բյուրոկրատական խոչընդոտներն ու մարտահրավերները, որոնք, ըստ նախարարի, լրջագույն խնդիրներ են ստեղծում ռազմաարդյունաբերողների համար:
«Ստեղծում ենք նոր կարգեր՝ ֆինանսավորման, հայտերի ընդունման գործընթացում, հետայսու այդ կարգերի ընդունումից հետո մենք զգալիորեն հեշտացնելու ենք ռազմաարդյունաբերողների կյանքը»,- եզրափակեց նախարարը: