Գրականության և արվեստի թանգարանը «Պատում մեկ իրի» շարքը կսկսի «Ազնավուրի մանկության թատրոնը» ցուցադրությամբ
1 րոպեի ընթերցում
ԵՐԵՎԱՆ, 15 ՍԵՊՏԵՄԲԵՐԻ, ԱՐՄԵՆՊՐԵՍ: Գրականության և արվեստի թանգարանի նոր ցուցասրահում սեպտեմբերի 18-ից կգործի «Պատում մեկ իրի» ժամանակավոր ցուցադրությունների շարքը, որի շրջանակում պարբերաբար կցուցադրվեն թանգարանում պահվող բացառիկ ցուցանմուշներ։
Ինչպես «Արմենպրես»-ին տեղեկացրին թանգարանից, շարքի մեկնարկը կտրվի մեծն շանսոնյե Շառլ Ազնավուրի 100-ամյակին նվիրված «Ազնավուրի մանկության թատրոնը» ցուցադրությամբ, որի առանցքային մաս է կազմելու բացառիկ նմուշ հանդիսացող՝ 9-ամյա Ազնավուրի առաջին բեմական զգեստը։
«Ազնավուրի մանկության թատրոնը» ժամանակավոր ցուցադրությանը ներկայացվելու են նաև երբևէ չցուցադրված ցուցանմուշներ՝ Ազնավուրի մանկության լուսանկարներ, ներկայացումների ազդագրեր։