Հայաստանի գինու զբոսաշրջության առաջարկները մեկ տեղում. գործարկվելու է Winesofarmenia հավելվածը
3 րոպեի ընթերցում
![Հայաստանի գինու զբոսաշրջության առաջարկները մեկ տեղում. գործարկվելու է Winesofarmenia հավելվածը](http://armenpress.am/resized/480/storage/images/articles/2024/09/04/0oxYTPZIdYnt6YUFYUa1KA6mUlqRxasLj4BkphQz.webp)
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ։ Հայաստանի խաղողագործության և գինեգործության հիմնադրամն առաջիկայում կգործարկի նոր հավելված, որտեղ զբոսաշրջիկները մեկ տեղում կգտնեն Հայաստանի գինու զբոսաշրջությանը վերաբերող բոլոր առաջարկներն ու հնարավորությունները։ «Արմենպրես»-ի մամուլի սրահում հրավիրված ասուլիսում Հայաստանի խաղողագործության և գինեգործության հիմնադրամի գործադիր տնօրեն Զարուհի Մուրադյանը նշեց, որ զբոսաշրջիկները կարող են Winesofarmenia հավելվածի միջոցով իրենց նախասիրություններին համապատասխան տուր առանձնացնել։
«Գինով հետաքրքրված մարդիկ հավելվածի միջոցով տեղեկանալու են, թե ինչ է կատարվում Հայաստանի գինու ոլորտում։ Զբոսաշրջիկը հավելվածի միջոցով նախ կարող է ծանոթանալ գինու զբոսաշրջության հետ կապված տարվա ընթացքում սպասվող բոլոր միջոցառումներին, գինեգործական ընկերությունների այցելությունների առաջարկներին։ Քարտեզում կարող են տեսնել, թե տվյալ մարզում, տարածաշրջանում գինեգործության հետ կապված ինչ զբոսաշրջային վայրեր կան, և ըստ ցանկության էլ կազմել սեփական տուրը։ Զբոսաշրջիկների հայտն ուղարկվելու է գինեգործական ընկերություններին, թանգարաններին, պատասխանատու կազմակերպություններին, որոնք սպասարկելու են նրանց»,-ասաց Զարուհի Մուրադյանն՝ ընդգծելով, որ վերահսկելու են այդ շղթան, որ զբոսաշրջիկները պատշաճ ստանան իրենց նախընտրած ծառայությունը։
Հավելվածի մեջ ներբեռնվել են նաև Հայաստանի ռեստորանային առաջարկները՝ ներառյալ հայկական, չինական, մեքսիկական, իտալական և այլ խոհանոցներ։ Սա չի արվել միայն նրա համար, որ զբոսաշրջիկները տեղեկանան, թե Հայաստանում ինչ ռեստորաններ կան ու ինչ կարող են ճաշակել։ Դա ուղեկցվելու է տեղեկատվությամբ, թե այս կամ այն ռեստորանում առաջարկվող որ ուտեստների հետ ինչ տեսակի գինի է նախընտրելի վայելել։
«Նպատակն է այս գործիքակազմի միջոցով կրթել մարդկանց, որպեսզի ճիշտ կողմնորոշվեն ու հեշտությամբ ընտրեն գինին։ Առանձին բաժնում ներկայացվելու են գինու զբոսաշրջային ուղղություններն՝ ըստ մարզերի»,-ասաց Զարուհի Մուրադյանը։
Հավելվածը եռալեզու է՝ հայերեն, ռուսերեն, անգլերեն։ Այն պատրաստ է, այժմ տեխնիկական ստուգման փուլ է անցնում։ Նախատեսվում է հավելվածը գործարկել տարվա վերջ։