3 րոպեի ընթերցում
ԵՐԵՎԱՆ, 30 ՕԳՈՍՏՈՍԻ, ԱՐՄԵՆՊՐԵՍ: Հայաստանի բոլոր դպրոցներում 2023 թվականի սեպտեմբերից ներդրվել է հոգեբանի հաստիք: Ո՞րն է հոգեբանի դերը դպրոցում, ինչպե՞ս է կազմակերպում աշխատանքը, ո՞ւմ հետ է աշխատում, ո՞վ կարող է դիմել. սրանք հարցեր են, որոնց պատասխաններին բազմաթիվ ծնողներ իրազեկ չեն:
Նոր ուսումնական տարվա մեկնարկին ընդառաջ «Արմենպրես»-ը «Բացահայտելով հոգեբանի հետ» շարքի շրջանակում զրուցել է Երևանի թիվ 177 դպրոցի հոգեբան Քրիստինե Ալեքսանյանի հետ:
«Դպրոցի հոգեբանի ծառայությունը բավական բազմաբնույթ է և լայնածավալ: Գործունեությունը կազմակերպվում է ըստ հոգեբանի աշխատանքային պլանի, որն էլ ձևավորվում է դպրոցի տեսակի, տնօրինության առաջ քաշած հարցերի, ծնողների հետ հանդիպումների, դպրոցի հոգեբանի սուբյեկտիվ դիտարկումների հիման վրա: Հոգեբաններն աշխատում են և՛ երեխաների, և՛ մանկավարժների, և՛ ծնողական համայնքի հետ: Աշխատանքներն իրականացվում են տարբեր ուղղություններով՝ դիագնոստիկ, խորհրդատվական, շտկողական, զարգացման, սոցիալ-վերահսկողական, լուսավորչական՝ անհատական և խմբային»,-հոգեբանի գործառույթները ներկայացնում է Քրիստինե Ալեքսանյանը:
Նրա խոսքով՝ դպրոցում հոգեբաններն աշխատանքն սկսում են դիտման մեթոդով՝ դիտարկումներ բոլոր դասարաններում, հատուկ պրոյեկտիվ մեթոդներ են օգտագործում անհատական և խմբային աշխատանքում: Հոգեդիագնոստիկ աշխատանքի համար օգտագործվում են թեստեր, կատարվում է ախտորոշում և կազմվում է եզրակացություն: Մինչև եզրակացության կազմումը, աշխատանք է իրականացվում՝ և մանկավարժների, և ծնողների հետ, անհատական և խմբային: Երեխայի հետ անհատական աշխատանքի համար ծնողի համաձայնությունը պարտադիր է:
Հոգեբանի աշխատանքի հիմնական նպատակն է օգնել երեխային հաղթահարել դժվարությունները, որոնք առաջանում են թե՛ ուսումնական գործընթացում, թե՛ միջանձնային հարաբերություններում: Հանդիպում են ադապտացիոն խնդիրներ, վախեր, ինքնագնահատականի հետ կապված խնդիրներ, բուլինգ, կոնֆլիկտներ փոխհարաբերություններում, ինտելեկտուալ ոլորտի դժվարություններ՝ ուշադրության, հիշողության, կենտրոնացման և այլ հարցերի հետ կապված: Առանձնահատուկ է աշխատանքը թե՛ առաջին դասարանցիների, թե՛ դեռահասների հետ:
Իսկ թե ի՞նչ խորհուրդներ է հոգեբանը տալիս ծնողներին, որոնք դպրոցում ամեն րոպե իրենց երեխայի կողքին լինելու հնարավորություն չունեն, ի՞նչ մոտեցումներ է ցուցաբերում առաջին դասարանցիների մուտքը դպրոց անցնցում կազմակերպելու համար, ինչպե՞:ս է տարվում աշխատանքը համընդհանուր ներառականությանն անցումից հետո, ի՞նչ հարցերով կարող են ծնողները դիմել դպրոցի հոգեբանին՝ Քրիստինե Ալեքսանյանը պատասխանել է զրույցի առավել ընդարձակ տեսանյութում: