Հնդկաստանն ԱՄՆ-ից գնել է ևս 73 000 ինքնաձիգ
1 րոպեի ընթերցում
![Հնդկաստանն ԱՄՆ-ից գնել է ևս 73 000 ինքնաձիգ](http://armenpress.am/resized/480/storage/images/articles/2024/08/28/w489iQpZjEUEZi8xoVC0WAFFzcqBPPitIiUAey25.webp)
ԵՐԵՎԱՆ, 28 ՕԳՈՍՏՈՍԻ, ԱՐՄԵՆՊՐԵՍ: Հնդկաստանն ԱՄՆ-ի հետ ստորագրել է 73 հազար SIG-Sauer-716 Patrol ավտոմատ գրոհային հրացանների մատակարարման պայմանագիր՝ ՆԱՏՕ-ի 7,62x51 մմ ստանդարտ տրամաչափի փամփուշտների hամար: «Արմենպրես»-ի փոխանցմամբ՝ այդ մասին հաղորդում է The Times of India պարբերականը՝ վկայակոչելով զինվորական աղբյուրի։
«Խոցման 500 մ հեռահարությամբ SIG-Sauer-716 ինքնաձիգները նախատեսված են բանակային զորամասերի զինման համար, որոնք տեղակայված են Չինաստանի և Պակիստանի հետ Հնդկաստանի սահմաններին», - մեջբերում է հրատարակությունն աղբյուրի խոսքը։
Պայմանագիրն ստորագրվել է Հնդկաստանի պաշտպանության նախարարության կողմից իրականացվող արագացված ռազմական գնումների ծրագրի շրջանակներում։ Ավելի վաղ Նյու Դելին և Վաշինգտոնը կնքել են առաջին գործարքը, որը նախատեսում է 72 400 SIG-716 ինքնաձիգի մատակարարում: Դրանց համար զինամթերքի արտադրությունն ամբողջությամբ ապահովում են Հնդկաստանի ռազմարդյունաբերական համալիրի ձեռնարկությունները: