Սուդանում ամբարտակի փլուզումից գյուղեր են ավերվել, տասնյակ մարդիկ՝ զոհվել
1 րոպեի ընթերցում
![Սուդանում ամբարտակի փլուզումից գյուղեր են ավերվել, տասնյակ մարդիկ՝ զոհվել](http://armenpress.am/resized/480/storage/images/articles/2024/08/28/2mBsn6suFxVN4riu2QG14d30dvNEU8bGQAjwiMcm.webp)
ԵՐԵՎԱՆ, 28 ՕԳՈՍՏՈՍԻ, ԱՐՄԵՆՊՐԵՍ։ Սուդանում ամբարտակի փլուզման հետևանքով առնվազն 30 մարդ է զոհվել, ավերվել է 20 գյուղ, 50 000 մարդու տուն ոչնչացել է կամ վնասվել։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Միջադեպը տեղի է ունեցել օգոստոսի 25-ին, սակայն արտակարգ ծառայությունները դեռ փորձում են պարզել անհետ կորածների թիվը։
Սուդանը, որտեղ պատերազմ է ընթանում, արդեն տառապում է սովի և բնակչության տեղահանման ճգնաժամերից, իսկ հեղեղումները խոչընդոտում են հումանիտար օգնության մատակարարմանը, որն առանց այդ էլ բարդ էր բանակի և նրա հակառակորդ կիսառազմական «Արագ աջակցության ուժեր»-ի միջև շարունակվող հակամարտության պատճառով։
Դեռ մինչև ամբարտակի փլուզումը շատերը կտրված էին արտաքին աշխարհից՝ երկրում շարունակվող հորդառատ անձրևների պատճառով։
Հեղեղումների հետևանքով 118 000 մարդ տեղահանվել է ամբողջ երկրում։ Ընդհանուր առմամբ, հեղեղումներն ազդել են շուրջ 300 000 մարդու վրա. երկրում սկսել են տարածվել տարբեր հիվանդություններ, այդ թվում՝ խոլերա։