ՀՀ-ում այս պահին շրջանառվող կորոնավիրուսի տեսակը վարակելիության և ծանրության աստիճանով ավելի թույլ է. ՀՎԿԱԿ տնօրեն
1 րոպեի ընթերցում
![ՀՀ-ում այս պահին շրջանառվող կորոնավիրուսի տեսակը վարակելիության և ծանրության աստիճանով ավելի թույլ է. ՀՎԿԱԿ տնօրեն](http://armenpress.am/resized/480/storage/images/articles/2024/08/21/SvNSWCEahwxgWegcfrgDs8HLJpGxCxVC7HnVSA16.webp)
ԵՐԵՎԱՆ, 21 ՕԳՈՍՏՈՍԻ, ԱՐՄԵՆՊՐԵՍ: Հայաստանում վերջին օրերին գրանցվող կորոնավիրուսի դեպքերը նախորդ տարվա նույն ժամանակահատվածի համեմատ ավելացել են, սակայն այս պահին շրջանառվող «Օմիկրոն» շտամի JN1 տարատեսակը վարակելիության և ծանրության աստիճանով ավելի թույլ է:
«Արմենպրես»-ի հաղորդմամբ՝ այս մասին ասուլիսում ասաց Առողջապահության նախարարության Հիվանդությունների վերահսկման և կանխարգելման ազգային կենտրոնի(ՀՎԿԱԿ) գլխավոր տնօրեն Ստեփան Աթոյանը:
«Վերջին 14 օրվա ընթացքում արձանագրվել է կորոնավիրուսի 229 դեպք, ինչը նախորդ տարվա նույն ժամանակահատվածի համեմատ ավելի է 7 դեպքով: Իսկ վերջին 7 օրվա ընթացքում արձանագրվել է կորոնավիրուսի 113 դեպք, որը նույնպես նախորդ տարվա համեմատ մի փոքր ավելի է»,-ասաց Աթոյանը:
Նրա խոսքով՝ հիմա երկրում շրջանառվում է կորոնավիրուսի «Օմիկրոն» շտամի JN1 տարատեսակը:
«Այն իր վարակելիությամբ և ծանրության աստիճանով ավելի թույլ է, քան նախորդ տարիներին գրանցված շտամերը: Մահացության ցուցանիշը 0.5 է: 2021-ին գրանցված ամենաագրեսիվ ցուցանիշը եղել է 2.1»,-ասաց ՀՎԿԱԿ գլխավոր տնօրենը:
Ստեփան Աթոյանը հատկապես ռիսկի խմբում գտնվող անձանց հորդորեց պատվաստվել: