ԵՐԵՎԱՆ, 19 ՕԳՈՍՏՈՍԻ, ԱՐՄԵՆՊՐԵՍ: Աղբահանության նոր ձեռք բերված տեխնիկան ամբողջությամբ աշխատում է, սակայն այս պահին վարորդների թափուր հաստիքներ կան:
«Արմենպրես»-ի հաղորդմամբ՝ այս մասին Երևանի քաղաքապետարանի գործակարգավարական նիստի ժամանակ ասաց «Երևանի աղբահանություն և սանիտարական մաքրում» ընկերության ղեկավար Սաշա Կատվալյանը։
«Մոտ 15 վարորդի կարիք ունենք, որ կարողանանք լիարժեք աշխատանքներ իրականացնել, որովհետև բոլոր վարորդները դուրս են գալիս տարածք, և եթե մի մեքենա խափանվում է տարածքում, տվյալ վարչական շրջանում արագ փոխարինման կարիք է առաջանում։ Փաստացի, պահուստային վարորդ չունենք, բայց ունենք պահուստային ավտոմեքենաներ»,-նշեց նա:
Կատվալյանը նաև հավելեց, որ կայացել է բանվորների և հավաքարարների արտահագուստի մրցույթը, կա հաղթող ընկերություն և ֆինանսական միջոցներ տրամադրելուց հետո արդեն կկնքվի պայմանագիր, որպեսզի մատակարարվի արտահագուստը:
«Մեր բանվորներն ու հավաքարարներն արդեն կունենան պատշաճ արտահագուստ»,-նշեց «Երևանի աղբահանություն և սանիտարական մաքրում» ընկերության ղեկավարը:
Ըստ նրա՝ ծրագրի համար կծախսվի մոտ 11 մլն դրամ: