2 րոպեի ընթերցում
ԵՐԵՎԱՆ, 26 ՀՈՒԼԻՍԻ, ԱՐՄԵՆՊՐԵՍ։ Փարիզի դատախազությունը հետաքննություն է սկսել այն բանից հետո, երբ Ֆրանսիայի արագընթաց գնացքների ցանցը Օլիմպիական խաղերի բացումից ժամեր առաջ լայնածավալ սաբոտաժի էր ենթարկվել՝ խոչընդոտելով հարյուր հազարավոր մարդկանց տեղաշարժը։
«Արմենպրես»-ի փոխանցմամբ՝ France24 պարբերականը հայտնում է, որ Ֆրանսիայի անվտանգության ուժերը փորձում են գտնել հուլիսի 26-ին տեղի ունեցած հարձակումների մեղավորներին։
«Մեր հետախուզական ծառայությունները և իրավապահ մարմինները մոբիլիզացված են՝ գտնելու և պատժելու այս հանցավոր գործողությունների հեղինակներին», - գրել է Ֆրանսիայի վարչապետ Գաբրիել Ատալը X սոցիալական հարթակում՝ անվանելով հարձակումները «նախապատրաստված և համակարգված սաբոտաժի գործողություններ», որոնք «հսկայական և լուրջ հետևանքներ» են ունեցել երկաթուղային ցանցի համար։
Փարիզի դատախազությունը հետաքննություն է սկսել «հիմնարար ազգային շահերը» խաթարելուն ուղղված գործողությունների փաստով՝ նշելով, որ այս հանցագործության համար սպառնում է մինչև 20 տարվա ազատազրկում։
Դատախազությունը կհետաքննի ենթադրաբար կազմակերպված խմբի կողմից պատճառված վնասը և տվյալների մշակման ավտոմատացված համակարգի վրա հարձակումները։
Փարիզում Օլիմպիական խաղերի բացման արարողությունից ժամեր առաջ Ֆրանսիայի արագընթաց երկաթուղային ցանցը կաթվածահար է եղել՝ ազդելով մոտ 800 000 ուղևորի վրա։