Արվեստը ժամանակի սահմաններից դուրս. Նկարիչների միությունում կբացվի Հաղթանակ Շահումյանի 80-ամյակին նվիրված ցուցահանդեսը

ԵՐԵՎԱՆ,18 ՀՈՒԼԻՍԻ, ԱՐՄԵՆՊՐԵՍ։ Հայաստանի նկարիչների միությունում հուլիսի 18-ին ժամը 18:00-ին տեղի կունենա վաստակավոր արվեստագետ Հաղթանակ Շահումյանի (Հաղթո) 80-ամյա հոբելյանին նվիրված ցուցահանդեսի բացման արարողությունը։ 

«Արմենպրես»-ի փոխանցմամբ՝ ցուցահանդեսում կներկայացվեն գեղանկարչի տարբեր տարիների աշխատանքներ, ինչպես նաև ներառված կլինեն նոր գործեր, որոնք դեռևս չեն ցուցադրվել։

Հաղթանակ Շահումյանը մոտ երկու տասնամյակ, զբաղեցնելով Երևան քաղաքի գլխավոր նկարչի պաշտոնն, իր գործուն ներդրումն է ունեցել նաև Երևանի ավանդական կերպարի ու քաղաքացու համակեցության մշակույթի ձևավորմանը։

Այս ցուցահանդեսը հնարավորություն է ականատես լինելու գեղանկարչի արվեստի ընթացքին և նշելու գեղանկարչի ճանապարհի կարևոր իրադարձությունները:

Ցուցահանդեսը բաց կլինի մինչև հուլիսի 27-ը ներառյալ։