ՀՀ վարչապետ Փաշինյանը խստորեն դատապարտել է ԱՄՆ նախագահի թեկնածու Դոնալդ Թրամփի վրա հարձակումը

ԵՐԵՎԱՆ, 14 ՀՈՒԼԻՍԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանը խստորեն դատապարտել է ԱՄՆ 45-րդ նախագահ և նախագահի թեկնածու Դոնալդ Թրամփի վրա հարձակումը: «Արմենպրես»-ի հաղորդմամբ՝ այս մասին վարչապետը գրել է X-ի իր միկրոբլոգում։

«Բռնության նման գործողությունները տեղ չունեն ժողովրդավարական հասարակության մեջ, քանի որ դրանք խաթարում են ժողովրդավարության և օրենքի գերակայության հիմնական սկզբունքները, որոնք մենք խորապես արժևորում ենք: 

Դոնալդ Թրամփին շուտափույթ ապաքինում եմ մաղթում»,- նշել է ՀՀ վարչապետ Փաշինյանը։

We strongly condemn the attack on 🇺🇸45th President & presidential candidate Donald Trump.

Such acts of violence have no place in democratic society, as they undermine the core principles of democracy & rule of law that we deeply value.

I wish Donald Trump a speedy recovery.

— Nikol Pashinyan (@NikolPashinyan) July 14, 2024

ԱՄՆ նախկին նախագահ Դոնալդ Թրամփի հուլիսի 13-ի երեկոյան, Փենսիլվանիայի նահանգի Բաթլեր քաղաքում կայացող նախընտրական հանրահավաքի ժամանակ հրաձգություն է տեղի ունեցել, որի հետևանքով Թրամփը վիրավորվել է։ Հանրահավաքի առնվազն մեկ մասնակից զոհվել է, ևս երկուսը՝ վիրավորվել։ 

Թրամփը սոցիալական ցանցերում հայտնել է, որ գնդակը դիպել է իր «աջ ականջի վերին հատվածին»։ Նախկին նախագահի խոսնակը տեղեկացրել է, որ նրա հետ ամեն ինչ լավ է։

Ըստ գաղտնի ծառայությունների՝ հրաձիգը բարձր դիրքից մի քանի կրակոց է արձակել, նախքան գործակալների կողմից սպանվելը։ 

Իրավապահները CNN-ին հայտնել են, որ նա եղել է շենքի տանիքին՝ հանրահավաքի անցկացման վայրի մոտ։ Միջադեպը հետաքննվում է որպես սպանության փորձ։

Հրաձգությունից հետո ԱՄՆ նախագահ Ջո Բայդենը խոսել է Դոնալդ Թրամփի հետ և դատապարտել հարձակումը։ Բայդենը նաև հայտարարություն է տարածել՝ նշելով, որ «երախտապարտ է», որ Թրամփն ապահով է։