Հակասությունների մեջ ներգրավված չեմ, այդ մասին ոչինչ չգիտեմ․ Սփեյսին՝ Երևանում իր դեմ անցկացվող բողոքի ակցիայի մասին
2 րոպեի ընթերցում
ԵՐԵՎԱՆ, 9 ՀՈՒԼԻՍԻ, ԱՐՄԵՆՊՐԵՍ։ Հոլիվուդյան աշխարհահռչակ դերասան Քևին Սփեյսին անդրադարձել է Հայաստանում իր դեմ անցկացվող ցույցերի մասին հարցին։
«Արմենպրես»-ի փոխանցմամբ՝ Քևին Սփեյսին թեմային անդրադարձել է «Ոսկե ծիրան» կինոփառատոնի շրջանակներում իր երկրպագուների հետ հանդիպման ժամանակ՝ պատասխանելով լրագրողներից մեկի հարցին։
«Ինձ հրավիրել են ձեր երկիր՝ որպես կինոփառատոնի պատվավոր հյուր, ինձ համար մեծ պատիվ է այստեղ լինելը։ Երեկ հրաշալի ժամանակ եմ անցկացրել ուսանողների հետ։ Ես ոչ մի հակասությունների մեջ ներգրավված չեմ, այդ մասին ոչինչ չգիտեմ»,- ասել է Սփեյսին։
Քևին Սփեյսին Հայաստան է հրավիրվել՝ որպես «Ոսկե ծիրան» կինոփառատոնի պատվավոր հյուր։ Օսկարակիր դերասանը հուլիսի 9-ին Կինոյի տանը բաց հանդիպում է անցկացնում իր երկրպագուների հետ։ Մի շարք հասարակական կազմակերպություններ վերջին օրերին իրենց բողոքն էին արտահայտել Քևին Սփեյսիի՝ Հայաստան այցի առնչությամբ։ Պատճառն այն է, որ դերասանը մեղադրվել է սեռական բռնություն գործադրելու մեջ՝ չնայած այն հանգամանքին, որ ԱՄՆ դատարանն անմեղ էր ճանաչել ու արդարացրել էր նրան։ Դերասանի հանդիպումը երկրպագուների հետ պետք է կայանար Ամերիկյան համալսարանում, սակայն ՀԿ-ների բողոքի պատճառով այն չեղարկվեց, ավելի ուշ հայտնի դարձավ, որ հանդիպումը կկայանա Կինոյի տանը։