Մարմնամարզիկները ՕԽ մեկնարկից առաջ սկսել են հավաքը Ֆրանսիայում

ԵՐԵՎԱՆ, 9 ՀՈՒԼԻՍԻ, ԱՐՄԵՆՊՐԵՍ: Փարիզի ամառային Օլիմպիական խաղերի ուղեգիր նվաճած Հայաստանի մարմնամարզության հավաքականի անդամներն արդեն Ֆրանսիայում են:

«Արմենպրես»-ի հաղորդմամբ` Հայաստանի ընտրանու անդամներ Արթուր Դավթյանը և Վահագն Դավթյանը մինչ Օլիմպիական խաղերի մեկնարկը ուսումնամարզական հավաք կանցկացնեն Ֆրանսիայում` պատրաստվելով մրցաշարին:

Հավաքականի մարզիչ Հայկ Նազարյանը ևս մարմնամարզիկների հետ է:

Հայաստանը Փարիզի 33-րդ ամառային Օլիմպիական խաղերին կունենա 15 մասնակից` հրաձիգ Էլմիրա Կարապետյանը, մարմնամարզիկներ Արթուր Դավթյանը (հենացատկ), Վահագն Դավթյանը (օղակներ), ըմբիշներ Սլավիկ Գալստյանը (հունահռոմեական ոճ, 67 կգ), Մալխաս Ամոյանը (հունահռոմեական ոճ, 77 կգ), Արթուր Ալեքսանյանը (հունահռոմեական ոճ, 97 կգ), Արսեն Հարությունյանը (ազատ ոճ, 57 կգ), Վազգեն Թևանյանը (ազատ ոճ, 65 կգ), ծանրորդներ Անդրանիկ Կարապետյանը (89 կգ), Գարիկ Կարապետյանը (102 կգ), Վարազդատ Լալայանը (+102 կգ),  բռնցքամարտիկ Դավիթ Չալոյանը (+92 կգ), լողորդներ Արթուր Բարսեղյանը և Վարսենիկ Մանուչարյանը, աթլետ Երվանդ Մկրտչյանը: