Մարտունի համայնքի ղեկավարն ընդունել է Ֆրանսիայի Իզերի դեպարտամենտի գյուղատնտեսության պալատի մասնագետներին
2 րոպեի ընթերցում
ԳԱՎԱՌ, 4 ՀՈՒԼԻՍԻ, ԱՐՄԵՆՊՐԵՍ։ Գեղարքունիքի մարզի Մարտունի համայնքի ղեկավար Հովհաննես Հովեյանն ընդունել է Ֆրանսիայի Իզերի դեպարտամենտի գյուղատնտեսության պալատի մասնագետներին, ովքեր Գեղարքունիք-Իզեր համագործակցության շրջանակներում գտնվում են Գեղարքունիքի մարզում։
Ինչպես «Արմենպրես»-ը տեղեկացավ Մարտունու համայնքապետարանի աշխատակազմից, այցի նպատակը ՀՀ Գեղարքունիքի մարզի և Ֆրանսիայի Հանրապետության Իզերի դեպարտամենտի միջև գյուղատնտեսության ոլորտում համագործակցության հաստատումն է։
Հովհաննես Հովեյանը ֆրանսիական կողմին ներկայացրել է Մարտունի համայնքի գյուղատնտեսության առանձնահատկությունները, զարգացման հեռանկարները և հիմնախնդիրները, համայնքում գյուղատնտեսության զարգացման հիմնական ուղղությունները, ոլորտում իրականացվող պետական աջակցության ծրագրերը։
Հյուրերի մոտ հետաքրքրություն է առաջացրել Մարտունի համայնքում մեծ մակերեսներով արոտավայրեր ունենալու փաստը, որը մեծ հնարավորություններ է ընձեռում ոչխարաբուծության զարգացման համար, ու նրանք առաջարկել են ներդրումներ կատարել այդ ոլորտում՝ շեշտը դնելով նոր ցեղատեսակների ներմուծման վրա:
Ֆրանսիական կողմին հետաքրքրել է նաև այգեգործության ոլորտը, որը ևս զարգացման տեսանելի հեռանկարներ ունի:
Հանդիպման ավարտին կողմերը պայմանավորվել են՝ համատեղ ու ամբողջական ուսումնասիրություններ իրականացնելուց հետո անցնել գործնական քայլերի:
Հովհաննես Հովեյանը ողջունել ֆրանսիական պատվիրակության անդամների ներկայացրած առաջարկը՝ նշելով, որ համագործակցության իրականացման արդյունքում Մարտունի համայնքը կունենա ժամանակակից, զարգացած գյուղատնտեսություն:
Խոսրով Խլղաթյան