Միլիարդատեր Ուորեն Բաֆեթը հայտնել է, թե ուր կգնա իր ունեցվածքի մեծ մասը մահից հետո

ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ։ Միլիարդատեր Ուորեն Բաֆեթը (ըստ Forbes-ի՝ կարողությունը 128 մլրդ դոլար է) իր միջոցների մեծ մասը կտրամադրի հատուկ ստեղծված հիմնադրամին, որի հոգաբարձուները կլինեն նրա երեխաները ՝ Սյուզի, Հովարդ և Փիթեր Բաֆեթները։ «Արմենպրես»-ի հաղորդմամբ՝ այս մասին նա հայտնել է The Wall Street Journal-ին տված հարցազրույցում։

Այսպիսով, Berkshire Hathaway-ի գործադիր տնօրենը բացառել է, որ գումարը բաժին կհասնի Բիլ Գեյթսի հիմնադրամին, որի հետ նախկինում համագործակցել է ներդրողը: 

«Գեյթսի հիմնադրամն իմ մահից հետո ոչ մի գումար չի ստանա», - ասել է Բաֆեթը: 

Միլիարդատիրոջ խոսքով ՝ նա իր երեխաներին ոչ մի ցուցում չի տվել, բայց նրանց հետ կիսվել է անձնական հայացքով, թե ինչպես օգտագործել իր հարստությունը. 

«Այն պետք է օգտագործել այն մարդկանց օգնելու համար, ովքեր այնքան հաջողակ չեն, որքան մենք: Մենք պետք է օգնենք նրանց: Աշխարհում կա 8 միլիարդ մարդ։ Մարդկանց օգնելու բազմաթիվ եղանակներ կան: Երեխաները պետք է միաձայն որոշեն, թե ինչ բարեգործական նպատակներով են ծախսվելու գումարները»,-ասել է Բաֆետը։