Ռուսաստանը հայտնել է Ուկրաինայի ԶՈՒ կողմից Սևաստոպոլի հրթիռակոծման մասին

ԵՐԵՎԱՆ, 23 ՀՈՒՆԻՍԻ, ԱՐՄԵՆՊՐԵՍ: ՌԴ Պաշտպանության նախարարության տեղեկատվությամբ՝ հունիսի 23-ի ժամը 12.15-ին ուկրաինական կողմը  հարվածներ է հասցրել Սևաստոպոլ քաղաքին՝ կիրառելով կասետային մարտագլխիկներով ամերիկյան ATACMS օպերատիվ-մարտավարական հինգ հրթիռ։

«Արմենպրես»-ի հաղորդմամբ՝ այս մասին ՌԴ ՊՆ-ն հաղորդագրություն է տարածել «Տելեգրամ»-ի ալիքում՝ մանրամասնելով, որ հերթապահ հակաօդային պաշտպանության ուժերի կողմից, հրթիռային հարձակումը հետ մղելիս, ամերիկյան չորս ATACMS հրթիռ է որսացել։ Հինգերորդի բեկորային մարտագլխիկի օդում պայթելը հանգեցրել է բազմաթիվ զոհերի Սևաստոպոլում խաղաղ բնակիչների շրջանում։

Ռուսաստանի պաշտպանական գերատեսչության պնդմամբ՝ ամերիկյան ATACMS օպերատիվ-մարտավարական հրթիռների թռիչքային բոլոր ուղղությունները մուտքագրվում են ամերիկացի մասնագետների կողմից՝ հիմնվելով ԱՄՆ սեփական արբանյակային հետախուզական տվյալների վրա։

Ռուսական կողմը հայտարարել է, որ Սևաստոպոլում խաղաղ բնակիչների վրա կանխամտածված հրթիռային հարձակման պատասխանատվությունն առաջին հերթին կրում է Վաշինգտոնը, որը այդ զենքն է մատակարարել Ուկրաինային, ինչպես նաև Ուկրաինան, որի տարածքից էլ ձեռնարկվել է այս հարձակումը։

Սևաստոպոլի մարզի ղեկավար Միխայիլ Ռազվոժաևը վերոնշյալ սոցցանցի իր ալիքում հայտնել է, որ հրթիռային հարվածների հետևանքով զոհերի թիվը հասել է հինգի՝ այդ թվում 2 երեխա, իսկ 82 անձ հոսպիտալացվել է: