Գյումրիում մեկնարկել է «Art շաբաթ-2024» դասական երաժշտության չորրորդ փառատոնը

ԳՅՈՒՄՐԻ,  13  ՀՈՒՆԻՍԻ,  ԱՐՄԵՆՊՐԵՍ: Գյումրիում մեկնարկել է «Art շաբաթ-2024» դասական երաժշտության չորրորդ փառատոնը, որն անցկացվում է չորրորդ անգամ՝ Գյումրիի քաղաքապետարանի մշակույթի և երիտասարդության հարցերի բաժնի նախաձեռնությամբ:

«7 օր քաղաքի տարբեր համերգասրահներում, թանգարաններում և դահլիճներում հնչելու է դասական երաժշտություն, անցկացվելու է վարպետության դասեր, բանախոսություններ. ընդհանուր թվով «Art շաբաթ»-ը կանցկացնի 11 միջոցառում»,-«Արմենպրես»-ին տեղեկացրեց համայնքապետարանի Մշակույթի և երիտասարդության հարցերի բաժին պետ Լիլիթ Թովմասյանը՝ հավելելով, որ փառատոնը նաև այն հարթակն է, որը հնարավորություն է տալիս պատանի և երիտասարդ կատարողներին չսահմանափակվել միայն իրենց երաժշտական կրթական հաստատությունների հանրույթներում ելույթներ ունենալով, նրանց հարկավոր է նաև մեծ լսարանի առջև ներկայանալ։

Այս անգամ մայրաքաղաքից «Art շաբաթ»-ը հյուրընկալել է դասական երաժշտության 5 միջոցառում։

«Art շաբաթ» փառատոնը մրցութային չէ, պարգևատրումներն անվանակարգեր չունեն, ինչպես նշում են կազմակերպիչներն՝ այստեղ հաղթողներ չեն լինելու, մշակութային այսպիսի միջոցառումները հավակնում են դառնալ դասական երաժշտության հանրայնացման ձևաչափ։

Փառատոնի շրջանակներում պատանի ստեղծագործողներն ու երաժիշտ-կատարողները ներկայացնելու են դասական արվեստ։ «Art շաբաթ» փառատոնի բեմերը բոլոր պրոֆեսիոնալ և ուսանող կատարողների համար բաց են։ Տարբերակում չի դրվել համայնքապատկան և ոչ համայնքապատկան կառույցների միջև, ներգրավվել են բոլոր նրանք, ովքեր ստեղծում և սիրում են դասական երաժշտություն։        

Արմենուհի Մխոյան