Շվեյցարացի պատգամավորը Ուկրաինայի Գերագույն Ռադայի խոսնակի պատճառով ընդհարվել է ոստիկանների հետ
1 րոպեի ընթերցում
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ։ Շվեյցարիայի խոշորագույն խորհրդարանական կուսակցության՝ «Կենտրոնի ժողովրդավարական միության» պատգամավոր Թոմաս Աեսկին երկրի օրենսդիր մարմնում ընդհարվել է ոստիկանների հետ, որոնք փակել են նրա ճանապարհը, որպեսզի շենքում գտնվող Ուկրաինայի Գերագույն Ռադայի խոսնակ Ռուսլան Ստեֆանչուկը կարողանա լուսանկարվել:
«Արմենպրես»-ի հաղորդմամբ՝ միջադեպի մասին հայտնել են Շվեյցարիայի խորհրդարանի մամուլի ծառայությունը և անձամբ պատգամավորը, որը համապատասխան տեսանյութ է հրապարակել սոցիալական ցանցում։
«Ինչպես տեսնում եք, թույլ չտվեցի, որ ինձ կանգնեցնեն: Խոսքն այն մասին է, որ նստաշրջանի ընթացքում խորհրդարանական աշխատանքը գերակայում է արտասահմանյան պետական այցերի նկատմամբ»,- տեղի ունեցածը մեկնաբանել է քաղաքական գործիչը:
Մեկ այլ պատգամավոր՝ Քրիստիան Վասերֆալենը հայտարարել է, որ խորհրդարանի շենքում առաջին անգամ էր տեսնում ինքնաձիգներով զինված ոստիկանների, որոնք խոչընդոտում էին աշխատակիցների և պատգամավորների ազատ տեղաշարժին:
Ուկրաինայի Ռադայի նախագահ Ռուսլան Ստեֆանչուկը հունիսի 12-ին պաշտոնական այց է կատարել Շվեյցարիայի խորհրդարան, որպեսզի քննարկի Բեռնի դիվանագիտական և մարդասիրական աջակցությունը Կիևին: