388.78
Հայաստանի Սահմանադրության փոփոխության հարցն Ադրբեջանի հետ բանակցությունների մաս չի կարող լինել. Նիկոլ Փաշինյան
2 րոպեի ընթերցում
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Հայաստանի Սահմանադրության փոփոխությունը Հայաստանի և Ադրբեջանի միջև խաղաղության պայմանագրի շուրջ բանակցության մաս լինել չի կարող, դա բացառապես Հայաստանի ներքին օրակարգն է:
«Արմենպրես»-ի հաղորդմամբ՝ այս մասին հայտարարեց Հայաստանի վարչապետ Նիկոլ Փաշինյանը խորհրդարանում լրագրողների հետ զրույցում՝ անդրադառնալով Ադրբեջանի նախագահի այն հայտարարությանը, թե խաղաղության պայմանագրի կնքումն անհնար է առանց ՀՀ Սահմանադրության փոփոխության:
«Ես կարծում եմ, որ Սահմանադրության փոփոխությունների հարցը փորձել բերել բանակցությունների սեղան, խաղաղության գործընթացի տորպեդահարում է: Չեմ բացառում, որ այդտեղ կան որոշակի միտումներ՝ միջամտություններ իրականացնել Հայաստանի ներքին գործերին, նաև որոշակի դեզինֆորմացիայի վրա հիմնված գործընթացներ հարուցել Հայաստանում»,–ասաց Փաշինյանը:
Վարչապետը հիշեցրեց, որ ինքը Սահմանադրության փոփոխության մասին խոսել է դեռ 2019 թվականին: Նա շեշտեց, որ Սահմանադրության փոփոխության հետ կապված ՀՀ իշխանության օրակարգը բացառապես կապված է ժողովրդավարական բարեփոխումների հետ:
«Եվ մենք ասել ենք, որ Սահմանադրության փոփոխությունը բանակցության մաս լինել չի կարող, որովհետև դա բացառապես մեր ներքին օրակարգն է»,-վերահաստատեց վարչապետը:
