2 րոպեի ընթերցում
ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: ԱՄՆ պետքարտուղար Էնթոնի Բլինքենը հայտարարել է, որ ամերիկյան վարչակազմն առայժմ չի վերացրել Ռուսաստանի տարածքի վրա հարձակումների համար ամերիկյան զենքի օգտագործման սահմանափակումները, սակայն Կիևը պետք է ինքը որոշում կայացնի իր տրամադրության տակ եղած զենքերն օգտագործելու վերաբերյալ:
«Արմենպրես»-ի փոխանցմամբ՝ այս մասին Բլինքենը հայտնել է Ներկայացուցիչների պալատի արտաքին հարաբերությունների հանձնաժողովի լսումների ժամանակ։
«Ուկրաինան ինքը պետք է կայացնի որոշումը, և այդպես էլ կանի: Ես կարող եմ վստահեցնել, որ նա դրա համար ունի բոլոր անհրաժեշտ միջոցները», - ասել է Բլինքենը՝ հավելելով, որ Վաշինգտոնը չի փոխել ամերիկյան զենքի օգտագործման սահմանափակումների մասին իր որոշումը:
Մայիսի 22-ին POLITICO-ն հայտնել էր, որ մի խումբ ամերիկացի կոնգրեսականներ՝ Ներկայացուցիչների պալատի հետախուզության հանձնաժողովի նախագահ Մայք Թըրների գլխավորությամբ, պաշտպանության նախարար Լլոյդ Օսթինին ուղղված հավաքական նամակով պահանջել են, որ կառավարությունն Ուկրաինային թույլ տա օգտագործել ԱՄՆ-ի կողմից մատակարարված զենքերը Ռուսաստանի տարածքի օբյեկտներին հարվածներ հասցնելու համար։
«Կոնգրեսականներն ընդգծում են այն, որ Ռուսաստանից ավելի լավ պաշտպանվելու համար Ուկրաինային անհրաժեշտ է, որ Միացյալ Նահանգները նրան թույլատրի այնպիսի զենք օգտագործել, որն իր զինվորականներին թույլ կտար հարվածներ հասցնել Ռուսաստանի տարածքում գտնվող ռազմավարական օբյեկտներին», - ասվել է նամակում: