1 րոպեի ընթերցում
ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: ԱՄՆ զինված ուժերի Կենտրոնական հրամանատարության (CENTCOM) անձնակազմը ժամանակավոր նավամատույց է տեղակայել Գազայի հատվածի ափերի մոտ՝ մարդասիրական օգնության առաքման համար։ «Արմենպրես»-ի փոխանցմամբ՝ այս մասին CENTCOM-ը հայտնել է X սոցիալական հարթակում։
«Այսօր տեղական ժամանակով մոտավորապես ժամը 07:40-ին ԱՄՆ Կենտրոնական հրամանատարության աշխատակիցները, որոնք աջակցում են կարիքի մեջ գտնվող պաղեստինցի խաղաղ բնակիչներին մարդասիրական օգնության առաքման առաքելությանը, ժամանակավոր նավամատույց են տեղակայել Գազայի հատվածի ափին», - ասված է CENTCOM-ի հաղորդագրության մեջ։
Կենտրոնական հրամանատարությունն ընդգծում է, որ կառույցի տեղակայման համար ամերիկյան զորքերը չեն մտել պաղեստինյան անկլավի տարածք:
Առաջիկա օրերին, ըստ հաղորդագրության, հումանիտար օգնությամբ բեռնատարները կմտնեն անկլավ։ Օգնությունը կստանա ՄԱԿ-ը և կհամակարգի դրա բաշխումը Գազայում։