1 րոպեի ընթերցում
ԵՐԵՎԱՆ, 15 ՄԱՅԻՍԻ, ԱՐՄԵՆՊՐԵՍ: Ուկրաինայի նախագահ Վլադիմիր Զելենսկին չեղարկել է Իսպանիա և Պորտուգալիա ուղևորությունը՝ երկրում ստեղծված «լուրջ ներքին իրադրության պատճառով»։ «Արմենպրես»-ի փոխանցմամբ՝ այս մասին հաղորդել է CNN Portugal հեռուստաալիքը։
Լրատվամիջոցի տվյալներով՝ Կիևը բարդ իրավիճակի է բախվում ճակատի մի քանի հատվածներում, մասնավորապես, Խարկովի մարզում, ինչը նպատակահարմար չի դարձնում ուկրաինական պատվիրակության մեկնումն արտասահման։
Իսպանիայի թագավորական արքունիքն իր հերթին տեղեկացրել է Զելենսկիի հետ միապետ Ֆիլիպ VI-ի` մայիսի 17-ին պլանավորված հանդիպման չեղարկման մասին։
Իսպանիայում Զելենսկին վարչապետ Պեդրո Սանչեսի հետ պետք է ստորագրեր երկկողմ անվտանգության համագործակցության համաձայնագիր։
Իր հերթին Reuters-ը հաղորդում է, որ Պորտուգալիայի կառավարության խոսնակը հայտնել է Ուկրաինայի նախագահի այցի չեղարկման մասին, սակայն դրա պատճառները չի նշել։
Մայիսի 13-ին SIC Notícias հեռուստաալիքը հաղորդել էր, որ Զելենսկին Պորտուգալիա է այցելելու՝ երկրների միջև անվտանգության շուրջ համաձայնագրի հնարավոր ստորագրման համար։