2 րոպեի ընթերցում
ԵՐԵՎԱՆ, 7 ՄԱՅԻՍԻ, ԱՐՄԵՆՊՐԵՍ: Չինաստանի նախագահ Սի Ծինփինը պետական այցի շրջանակներում Ֆրանսիայի նախագահ Էմանուել Մակրոնի հետ անցկացված բանակցությունների ընթացքում հայտարարել է, որ երկու երկրները պետք է անկախ դիրքորոշում ունենան և ջանքեր գործադրեն «նոր սառը պատերազմը» կանխելու համար: «Արմենպրես»-ի փոխանցմամբ՝ այդ մասին հաղորդում է Չինաստանի արտգործնախարարությունը։
«Մինչ աշխարհն անցնում է այնպիսի փոխակերպման և փոթորկումների միջով, ինչպիսիք չեն եղել մեկ դար շարունակ, Չինաստանը և Ֆրանսիան պետք է պահպանեն անկախությունը և համատեղ կանխեն «նոր սառը պատերազմը» կամ ճամբարների առճակատումը», - հայտարարել է Չինաստանի ղեկավարը։
Բացի այդ, Սի Ծինփինը նշել է, որ երկու երկրները պետք է «շարունակեն հասկանալ իրար, համատեղ նպաստեն ներդաշնակ համակեցությանը, պահպանեն հեռատեսությունը և զորակցեն բազմաբևեռ, իրավահավասար ու կանոնակարգված աշխարհին»։
Ըստ Չինաստանի ԱԳՆ-ի՝ կողմերը կարծիքներ են փոխանակել փոխադարձ հետաքրքրություն ներկայացնող միջազգային և տարածաշրջանային այնպիսի հարցերի շուրջ, ինչպիսիք են ուկրաինական ճգնաժամը և պաղեստինաիսրայելական հակամարտությունը։
«Չինաստանը և Ֆրանսիան ՄԱԿ-ի Անվտանգության խորհրդի մշտական անդամներ են և պետք է հանդես գան սուր հարցերի խաղաղ կարգավորման օգտին և իրենց ավանդը ներդնեն մոլորակի վրա կայուն խաղաղության և համընդհանուր անվտանգության հաստատման գործում», - ընդգծել է Սի Ծինփինը:
Նա կոչ է արել Մակրոնին ապահովել, որ Ֆրանսիան բարենպաստ պայմաններ ստեղծի չինական ձեռնարկությունների գործունեության համար, ընդլայնի բարձր տեխնոլոգիական արտադրանքի արտահանումը Չինաստան։
Այցի ընթացքում շուրջ 20 երկկողմ փաստաթուղթ է ստորագրվել էկոլոգիապես մաքուր զարգացման, ավիացիայի, ագրոպարենային արդյունաբերության, առևտրի և հումանիտար գիտությունների բնագավառներում համագործակցության շուրջ։