Երևանի ռուսական դրամատիկական թատրոնի «Փոքրիկ ողբերգությունները» կցուցադրվի Սանկտ Պետերբուրգի միջազգային փառատոնին

ԵՐԵՎԱՆ, 9 ԱՊՐԻԼԻ, ԱՐՄԵՆՊՐԵՍ: «Բալթյան տուն» թատրոն-փառատոնն ապրիլի 3-ից 9-ը կանցկացնի ԱՊՀ երկրների «Հանդիպումներ Ռուսաստանում» 26-րդ միջազգային թատերական փառատոնը։

«Արմենպրես»-ի հաղորդմամբ՝ այս տարի փառատոնը նվիրված է Ալեքսանդր Սերգեևիչ Պուշկինի ծննդյան 225-ամյակին։ Հրավիրված են 8 երկրից ժամանած առաջատար թատերական կոլեկտիվներ։

Երևանի Կոնստանտին Ստանիսլավսկու անվան պետական ռուսական դրամատիկական թատրոնը փառատոնի ծրագրի շրջանակներում կցուցադրի Ալ. Պուշկինի «Փոքրիկ ողբերգությունները» ներկայացումը՝ թատրոնի գեղարվեստական ղեկավար Կարեն Ներսիսյանի ռեժիսուրայով։

Ներկայացման ցուցադրությունը տեղի կունենա ապրիլի 9-ին:

«Հանդիպումներ Ռուսաստանում» փառատոնը ոչ միայն ներկայացումների ցուցադրություն է, այլ նաև թատրոնի պրոֆեսիոնալներին համախմբելու տարածք:

Ներկայացումներից բացի, փառատոնի օրերին կանցկացվեն քննարկումներ՝ ռեժիսորների, դերասանների և առաջատար թատերագետների մասնակցությամբ։