Բայդենը Նեթանյահուին սպառնացել է վերանայել իր քաղաքականությունը, եթե Իսրայելը Գազայի բնակչությանը պաշտպանելու քայլեր չձեռնարկի

ԵՐԵՎԱՆ, 5 ԱՊՐԻԼԻ, ԱՐՄԵՆՊՐԵՍ։ ԱՄՆ նախագահ Ջո Բայդենն Իսրայելի վարչապետ Բենիամին Նեթանյահուի հետ հեռախոսազրույցի ժամանակ անընդունելի է անվանել ապրիլի 1-ին հումանիտար աշխատողների վրա հարձակումը և, ընդհանուր առմամբ, Գազայի հատվածում տիրող հումանիտար իրավիճակը։ «Արմենպրես»-ի փոխանցմամբ՝ այս մասին հայտարարություն է տարածել Սպիտակ տունը։

Բայդենը վերջնագիր է ներկայացրել Նեթանյահուին՝ պաշտպանել քաղաքացիական անձանց և հումանիտար աշխատողներին, այլապես Վաշինգտոնը կարող է վերանայել իր աջակցությունն Իսրայելին պաղեստինյան ՀԱՄԱՍ արմատական շարժման դեմ պայքարում։

«Նա (Ջո Բայդենը) հստակ է դարձրել, որ Իսրայելը պետք է հայտարարի և իրագործի որոշակի, կոնկրետ և չափելի քայլեր՝ հասցեագրելու քաղաքացիական անձանց պատճառված վնասը, հումանիտար տառապանքը և հումանիտար աշխատողների անվտանգությունը։ Նա հստակ է դարձրել, որ Գազայի հետ կապված ԱՄՆ քաղաքականությունը կորոշվի այդ քայլերի ուղղությամբ Իսրայելի անմիջական գործողությունների մեր գնահատումից», - նշված է Սպիտակ տան հայտարարությունում։

ԱՄՆ նախագահը չի ասել, թե կոնկրետ ինչ քայլեր պետք է ձեռնարկի Իսրայելը կամ ինչպիսին կլինեն դրանք չձեռնարկելու հետևանքները։ Սակայն, ըստ Reuters-ի, վերլուծաբանները կարծում են, որ դա սպառնալիք է եղել՝ դանդաղեցնելու ամերիկյան զենքերի մատակարարումն Իսրայելին և պակասեցնելու ՄԱԿ-ում ԱՄՆ-ի կողմից Իսրայելին աջակցությունը։

Բայդենի այս ուղերձը Նեթանյահուին տեղի է ունենում Իսրայելի կողմից «Համաշխարհային կենտրոնական խոհանոց» բարեգործական կազմակերպության ավտոշարասյանը հասցրած հարվածներից հետո, որի հետևանքով 7 հումանիտար աշխատող է զոհվել։ Սա հանգեցրել է այն բանին, որ հումանիտար որոշ կազմակերպություններ դադարեցրել են գործողությունները Գազայի հատվածում։ Իսրայելը հայտարարել է, որ հարվածը եղել է սխալմունք։

Հոկտեմբերի 7-ին ՀԱՄԱՍ-ի զինյալների հարձակումից հետո Իսրայելում 1200 մարդ է զոհվել, շուրջ 250 մարդ՝ գերեվարվել։ Իսրայելի պատասխան ռազմական գործողությունների պատճառով ավելի քան 33 000 պաղեստինցի է զոհվել Գազայի հատվածում, որոնց մեծ մասն, ըստ տեղի իշխանությունների, կանայք և երեխաներ են։