1 րոպեի ընթերցում
ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ: Լատվիան կես տարով Բելառուսի հետ սահմանի պահպանության ուժեղացված ռեժիմ է սահմանել: Ինչպես «Արմենպրես»-ը տեղեկանում է «Ինտերֆաքս» գործակալությունից, այդ մասին հայտնել է երկրի Ներքին գործերի նախարարությունը։
«Նախարարների կաբինետը երեքշաբթի օրը՝ մարտի 12-ին կայացած իր նիստում կրկին վեց ամսով սահմանային պահպանության ուժեղացված ռեժիմ է հայտարարել», - հաղորդագրությունից մեջբերել է Լատվիայի ռադիոյի և հեռուստատեսության միասնական հարթակը։
Հստակեցվում է, որ Բելառուսի հետ սահմանի պահպանության ուժեղացված ռեժիմն սկսում է գործել մարտի 13-ից և կտևի մինչև ընթացիկ տարվա սեպտեմբերի 12-ը։
Հաղորդվում է, որ «հրամանը հրատարակվել է պետական սահմանի անվտանգությունն ապահովելու և սպառնալիքները կանխելու նպատակներով, ինչպես նաև հաշվի առնելով լատվիա-բելառուսական պետական սահմանն ապօրինի հատելու փորձերի՝ ներկայումս բացահայտված քանակը և դրանց աճի միտումը»:
Պետական սահմանային պահպանության ուժեղացմանն ուղղված են ոստիկանությունն ու ազգային զինված ուժերը։