Տավուշի մարզի Ներքին Կարմիրաղբյուր գյուղում անասնագոմի տանիք և մոտ 300 հակ անասնակեր է այրվել

ԵՐԵՎԱՆ, 1 ՄԱՐՏԻ, ԱՐՄԵՆՊՐԵՍ։ Տավուշի մարզային փրկարարական վարչության ճգնաժամային կառավարման կենտրոնը մարտի 1-ին, ժամը 15:26-ին ահազանգ է ստացել, որ Ներքին Կարմիրաղբյուր գյուղի 4-րդ փողոցի 1-ի նրբանցքի տներից մեկի հարևանությամբ այրվում է անասնագոմ:

Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր են մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատի և Քաղաքացիական պաշտպանության վարչության քաղաքացիական պաշտպանության ուժերի հավաքական կենտրոնի Տավուշի հատուկ օբյեկտների պահպանության հրշեջ-փրկարարական ջոկատի Ներքին Կարմիրաղբյուրի հենակետի մեկական մարտական հաշվարկ:

Նշվում է, որ հրդեհը մեկուսացվել է ժամը 16:56-ին, մարվել՝ 18:12-ին: Այրվել են անասնագոմի տանիքի մոտ 40 քմ հատվածը և հարակից կուտակած մոտ 300 հակ անասնակեր: