2 րոպեի ընթերցում
ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ։ ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ ռազմական դաշինքը չի պլանավորում մարտական ուժեր ուղարկել Ուկրաինա՝ չնայած այն հայտարարություններն և լուրերին, որ որոշ Արևմտյան երկրներ կարող են իրենց զինվորներին ուղարկել Ուկրաինա:
«Արմենպրես»-ի փոխանցմամբ՝ Ստոլտենբերգն Associated Press-ին ասել է, որ «ՆԱՏՕ-ի դաշնակիցներն աննախադեպ աջակցություն են ցուցաբերում Ուկրաինային»։
«Մենք դա արել ենք 2014 թվականից և ավելացրել ենք լայնամասշտաբ ներխուժումից հետո։ Բայց Ուկրաինայում ՆԱՏՕ-ի մարտական զորքերի տեղակայման պլաններ չկան», - ասել է Յենս Ստոլտենբերգը:
Ուկրաինայում Արևմտյան երկրների զինվորականների հնարավոր տեղակայման առնչությամբ Ֆրանսիայի նախագահ Էմանուել Մակրոնը Փարիզում Կիևին օգնության վերաբերյալ խորհրդաժողովից հետո հայտարարել էր, որ «ոչինչ չպետք է բացառել»։ Նա հայտնել էր, որ «ամեն ինչ հնարավոր է», չնայած բանակցությունների արդյունքում «պաշտոնական» փոխհամաձայնություն ձեռք չի բերվել։
Փարիզում տեղի ունեցած հանդիպումից առաջ Սլովակիայի վարչապետ Ռոբերտ Ֆիցոն էր հայտարարել, որ ԵՄ-ի և ՆԱՏՕ-ի առանձին երկրներ դիտարկում են Ուկրաինա զինվորներ ուղարկելու հարցը, և հավելել էր, որ ինքը դեմ է այդ գաղափարին։
Չեխիայի վարչապետ Պետր Ֆիալան իր հերթին շեշտել է, որ «Չեխիայի Հանրապետությունն, անշուշտ, չի ցանկանում իր զինվորներին ուղարկել Ուկրաինա»։
Լեհաստանի վարչապետ Դոնալդ Տուսկը փետրվարի 27-ին նույնպես ասել է, որ «Լեհաստանը չի նախատեսում իր զորքերն ուղարկել Ուկրաինա»։
Արձագանքելով Մակրոնի հայտարարությանը՝ ՌԴ նախագահի մամուլի քարտուղար Դմիտրի Պեսկովը հայտարարել էր, որ Արևմտյան զորքեր Ուկրաինա ուղարկելը կհանգեցնի Ռուսաստանի և ՆԱՏՕ-ի միջև ուղղակի ռազմական բախման: