2 րոպեի ընթերցում
ԵՐԵՎԱՆ, 21 ՓԵՏՐՎԱՐԻ, ԱՐՄԵՆՊՐԵՍ: BioNeex-ը, որը կենսադեղագործական արդյունաբերության գիտահետազոտական (R&D) բիզնեսի զարգացման հարթակ է, հայտարարել է 500 հազար դոլար սաղմնային փուլի ներդրում ներգրավելու մասին։
«Արմենպրես»-ի հաղորդմամբ՝ BioNeex-ի ներդրումները գլխավորել են բիոֆարմիկայի ոլորտի առաջատարները, այդ թվում՝ Pfizer-ի և Amgen-ի նախկին ղեկավարները: Ընկերությունը նաև հայտնել է, որ մեկնարկել է 6 միլիոն դոլարի ֆինանսավորման նոր փուլը:
BioNeex-ը կենսադեղագործական արդյունաբերության ոլորտում հետազոտության և զարգացման (R&D) տվյալների փոխանակման բաց հարթակ է: Այն հանդիսանում է առցանց ենթակառուցվածք, որտեղ կենսադեղագործական, կենսատեխնոլոգիական ընկերությունները և հետազոտական հաստատությունները կարող են կյանքի կոչել տարատեսակ համագործակցային ֆորմատներ հետազոտության և զարգացման (R&D) գծով՝ համատեղ նախագծերից մինչև ներդրումներ։ Այն սպասարկում է ավելի քան 300 կենսատեխնոլոգիական և կենսադեղագործական ընկերության, ինչպես նաև վենչուրային ֆոնդերի։
«Մենք հպարտ ենք տեսնել, որ կենսադեղագործական արդյունաբերության մեծ փորձ և գիտելիքներ ունեցող ոլորտի առաջնորդներն իսկապես հավատում են BioNeex պլատֆորմին՝ որպես գործիք, որը մեծացնում է գործընկերությունն ու ներդրումները կենսադեղագործական ոլորտում՝ շուկայում անհատական կապերի միջոցով»,-ասել է BioNeex-ի հիմնադիր և գործադիր տնօրեն Սմբատ Ռաֆայելյանը։
BioNeex-ի թիմին որպես տեխնոլոգիական տնօրեն միացել է Էդգար Մարուքյանը, որը նախկինում Renderforest ընկերության տեխնիկական տնօրենն է եղել, ինչպես նաև ղեկավարել է մի քանի ստարտափ: