Հայտնի է Ֆրանսիայի կառավարության նոր կազմը․ ԱԳ նախարարի պաշտոնում Կատրին Կոլոնային փոխարինել է Ստեֆան Սեժուրնեն
2 րոպեի ընթերցում
ԵՐԵՎԱՆ, 12 ՀՈՒՆՎԱՐԻ, ԱՐՄԵՆՊՐԵՍ: Ելիսեյան պալատը հայտարարել է կառավարության նոր կազմը` նորանշանակ վարչապետ Գաբրիել Ատալի գլխավորությամբ։
«Արմենպրես»-ի փոխանցմամբ՝ իրենց պաշտոնները պահպանել են Էկոնոմիկայի, ֆինանսների, արդյունաբերության և թվային ինքնիշխանության նախարար Բրունո Լը Մերը և Ֆրանսիայի ներքին գործերի նախարար Ժերալդ Դարմանենը։ Ֆրանսիայի զինված ուժերի նախարար է մնում Սեբաստիան Լեկոռնյուն։ Սպորտի նախարար Ամելի Ուդեա-Կաստերայի լիազորություններն ընդլայնվել են․ նա այսուհետ կղեկավարի ազգային կրթության, երիտասարդության, սպորտի, Օլիմպիական և Պարալիմպիկ խաղերի նախարարությունը։ Գյուղատնտեսության և պարենային անվտանգության նախարարի պաշտոնը կշարունակի զբաղեցնել Մարկ Ֆենոն, արդարադատության նախարարությունը՝ Էրիկ Դյուպոն-Մորետին։ Բնապահպանության և տարածքային միասնության նախարարությունը կղեկավարի Քրիստոֆ Բեշուն, իսկ բարձրագույն կրթության և հետազոտությունների նախարարությունը՝ Սիլվի Ռետայոն։
Գլխավոր փոփոխություններից մեկն արտաքին գործերի նոր նախարարի՝ Ստեֆան Սեժուրնեի նշանակումն է, որն այդ պաշտոնում փոխարինել է Կատրին Կոլոնային։
Մշակույթի նախարար է նշանակվել Ռաշիդ Դատին, աշխատանքի, առողջապահության և հանդուրժողականության նախարարի պաշտոնում նշանակվել է Կատրին Վոտրենը։