ԱՍՀ նախարարությունը պարզաբանել է «40+10 հազար դրամ» ծրագրի դիմումը լրացնելիս անչափահասի տվյալները մուտքագրելու քայլերը
2 րոպեի ընթերցում
ԵՐԵՎԱՆ, 7 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ աշխատանքի և սոցիալական հարցերի նախարարությունը պարզաբանել է այն քայլերը, որոնք Լեռնային Ղարաբաղից բռնի տեղահանվածները պետք է կատարեն այն դեպքում, երբ ժամանակավոր կացարաններում բնակության և կոմունալ ծախսերի վճարման համարնախատեսված«40+10 հազար դրամ» աջակցության ծրագրի շրջանակում ներկայացրել են դիմում, սակայն չեն մուտքագրել անչափահասի վերաբերյալ տվյալներ։
Ինչպես «Արմենպրես»-ին տեղեկացրին ՀՀ աշխատանքի և սոցիալական հարցերի նախարարությունից, ծրագրի շրջանակում անչափահասի համար դիմում կարող է ներկայացնել այն չափահաս քաղաքացին (ծնողը, խնամակալը կամ հոգաբարձուն), ով համակարգում արդեն ունի դիմում։
«Անչափահասի բաց թողնված տվյալները լրացնելու համար անհրաժեշտ է իրականացնել հետևյալ քայլերը՝
- մուտք գործելhttps://rent.socservice.amհղմամբ և լրացնել անձնական տվյալներ (անձը հաստատող փաստաթղթի համար, անուն, ազգանուն)՝ տալով «Սեղմել կոճակը՝ անձնական տվյալների նույնականացմանհամար»հրահանգը,
- համակարգը կցուցադրի հաղորդագրություն՝ «Նշված տվյալներով դիմում առկա է համակարգում։ Ցանկանո՞ւմ եք ավելացնել ընտանիքի անչափահաս անդամ»՝ «Այո/Ոչ» հրահանգներով,
- «Այո» հրահանգը սեղմելու դեպքում բացվում է ընտանիքի անդամի տվյալների լրացման միջերեսը (ինտերֆեյս), որտեղ հնարավոր է լրացնել միայն անչափահաս անդամի տվյալները,
- տվյալների լրացման կարգը նույնն է՝ ներառյալ փաստաթղթի կցման պահանջը,
- դիմումը ներկայացնելուց հետո համակարգում ավելանում է միայն անչափահասի տվյալներով ենթահայտը»,- ասվում է պարզաբանման մեջ: