Տիգրան Ավինյանը ավագանու նիստում տեղի ունեցած միջադեպի համար զգուշացում հայտարարեց ավագանու երեք անդամի

ԵՐԵՎԱՆ, 22 ՆՈՅԵՄԲԵՐԻ, ԱՐՄԵՆՊՐԵՍ։ Երևանի քաղաքապետ Տիգրան Ավինյանը զգուշացում հայտարարեց Երևանի ավագանու երեք անդամների՝ նոյեմբերի 21-ին ավագանու նիստի ժամանակ տեղի ունեցած միջադեպի համար։ Ինչպես հաղորդում է «Արմենպրես»-ը, նոյեմբերի 22-ին ավագանու նիստի մեկնարկին Ավինյանն անդրադարձավ ավագանու՝ նոյեմբերի 21-ին կայացած նիստի ժամանակ տեղի ունեցած միջադեպին, որն ուղեկցվել էր բռնության դրսևորումներով։

«Բռնությունը իր բոլոր դրսևորումներով մեզ համար մերժելի է և անընդունելի՝ լինի դա ավագանու նիստերի դահլիճում, թե դահլիճից դուրս։ Դա անընդունելի է, և համապատասխան միջոցներ պետք է ձեռնարկվեն, որպեսզի այդ բռնությունը որևէ դրսևորմամբ այս դահլիճում տեղ չունենա։ Ես ուզում եմ հատուկ շեշտել, որ երեկվա իրադարձության նման դրսևորումները կանխելու համար անձամբ ես չեմ նայելու՝ մեր խմբակցության, թե ընդդիմադիր խմբակցության ավագանի է, բոլորին հավասար վերաբերմունք է լինելու»,- հայտարարեց Ավինյանը։

Քաղաքապետը նշեց, որ իր լիազորությունների շրջանակներում զգուշացում է տալիս Երևանի ավագանու «Մայր Հայաստան» խմբակցության անդամներ Սոնա Աղեկյանին և Նարինե Հայրապետյանին ու «Հանրապետություն» խմբակցության ներկայացուցիչ Անի Խաչատրյանին։ «Եվ խնդրում եմ գնահատել այն հետևանքները, որ կարող է ունենալ խոսքը, որովհետև խոսքը, եթե պարունակում է բռնության սպառնալիք, ինչ-որ մի փուլում է վերածվում է ֆիզիկական բռնության»,- ասաց Ավինյանը։

Նա զգուշացրեց նաև Երևանի վարչական շրջանների բոլոր այն ղեկավարներին, որոնք մասնակցել են տեղի ունեցած հրմշտոցին։ «Հատուկ ուզում եմ շեշտել, որ նրանց նույնպես հետագա որևէ նման արարք չի ներվելու։ Բոլոր վարչական շրջանների ղեկավարներին, իմ թիմակիցներին ուզում եմ զգուշացնել, որ հետագայում որևէ նման քայլ չի ներվելու»,- եզրափակեց Ավինյանը։

Նոյեմբերի 21-ին Երևանի նորընտիր ավագանու առաջին նիստի ժամանակ տեղի էր ունեցել տհաճ միջադեպ ավագանու մի խումբ անդամների մասնակցությամբ։ Նախ միմյանց հասեցին վիրավորական արտահայտություններ էին հնչեցրել ավագանու «Հանրապետություն» խմբակցության ներկայացուցիչ Անի Խաչատրյանն ու «Մայր Հայաստան» խմբակցության անդամ Սոնա Աղեկյանը, ինչից հետո հրմշտոց ու քաշքշուկ էր սկսվել նաև ավագանու այլ անդամների մասնակցությամբ։ Մամուլում լուրեր էին տարածվել, որ այդ ամենին մասնակցություն են ունեցել նաև Երևանի վարչական շրջանների որոշ ղեկավարներ։