Միշուստինը հայտարարել է ընթացիկ տարում Ռուսաստանի ՀՆԱ-ի աճի մասին

ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ։ ՌԴ տնտեսական զարգացման նախարարության նախնական գնահատականի համաձայն՝ այս տարվա հունվար-սեպտեմբերին երկրի ՀՆԱ-ն աճել է 2,8 տոկոսով։ Ինչպես տեղեկացնում է «Արմենպրես»-ը՝ վկայակոչելով «Lenta.ru»-ն, այդ մասին հայտարարել է ՌԴ վարչապետ Միխայիլ Միշուստինը։

Վարչապետը նշել է, որ Ռուսաստանի տնտեսության աճ է սպասվում նաև տարեվերջին, իսկ սեպտեմբերին ՀՆԱ-ն աճել է գրեթե երկու անգամ ավելի, քան ինը ամսում։ Տարեկան կտրվածքով այդ ցուցանիշը ավելի քան հինգ տոկոս էր։

Միշուստինը նշել է, որ 2023 թվականի կեսերին տնտեսությունը գրեթե ամբողջությամբ վերականգնվել է, և պարզաբանել է, որ որոշակի անկում դեռևս նկատվում է նավթի և գազի ոլորտում, որտեղ արտահանման ուղիները զարգանում էին տասնամյակներ շարունակ, և ավելի շատ ժամանակ է պահանջվում մատակարարումները վերահղելու և նորերի հետ բանակցություններ վարելու՝ նոր շուկաներ և գնորդներ գտնելու համար։

Փորձագետները Ռուսաստանի տնտեսության ընդհանուր աճի տեմպերը կանխատեսում են 2,5 տոկոս։ Սեպտեմբերին դաշնային բյուջեի ձևավորման վերաբերյալ հանդիպման ժամանակ նախագահ Վլադիմիր Պուտինը 2023 թվականի վերջին սպասվող ՀՆԱ-ի աճը գնահատել էր 2,5-2,8 տոկոս: