Ինձ համար ցավալի էր, որ ծանրամարտի աշխարհի առաջնության մարզադահլիճի տրիբունաները դատարկ էին. Կարեն Գիլոյան

ԵՐԵՎԱՆ, 18 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության կրթության, գիտության, մշակույթի և սպորտի նախարարի տեղակալ Կարեն Գիլոյանը լիահույս է, որ Ծանրամարտի միջազգային ֆեդերացիան աշխարհի առաջնությունների անցկացումը կվստահի «ծանրամարտային երկրներին», որտեղ մարզաձևը սիրված է, և մարզադահլիճը դատարկ չի լինի:

«Ինձ համար ցավալի էր` աշխարհի առաջնության մարզադահլիճի տրիբունաները դատարկ էին: Երբ հիշում եմ Երևանի Եվրոպայի առաջնությունը, ափսոսանք եմ ապրում, որ աշխարհի առաջնությունում տրիբունաները դատարկ էին: Առանց այդ էլ մարզաձևը նկատմամբ հետաքրքրությունն անկում է ապրում: Ոչ «ծանրամարտային» երկրում աշխարհի առաջնությունն անցկացնելը վերջնականապես կզրոյացնի հետաքրքրությունը ծանրամարտի նկատմամբ»,- «Արմենպրես»-ի հետ զրույցում ասաց Գիլոյանը:

Նախարարի տեղակալի խոսքով` ծանրամարտի աշխարհի առաջնություն Եվրոպա աշխարհամասում վերջին անգամ անցկացվել է 2014 թվականին:

«Հաջորդ տարի էլ աշխարհի առաջնությունը կանցկացվի Բահրեյնում։ Վստահ եմ, որ տրիբունաները էլի դատարկ են լինելու: Մեր ցանկությունն է, որ մեծացնենք հետաքրքրությունը ծանրամարտի նկատմամբ»,-ասաց նա:

Գիլոյանը շնորհավորեց Հայաստանի ծանրամարտի հավաքականին աշխարհի առաջնության ժամանակ կատարած թիմային աշխատանքի համար:

Անդրադառնալով նախաօլիմպիական տարում հայ մարզիկների գրանցած արդյունքներին՝ Գիլոյանն ընդգծեց, որ Փարիզի Օլիմպիական խաղերում Հայաստանն առավելագույնը 3 ծանրորդ կարող է ունենալ և մարզչական շտաբը պետք է որոշի, թե որ մարզիկները պետք է ներկայացնեն Հայաստանը:

Վարվառա Հայրապետյան