2 րոպեի ընթերցում
ԵՐԵՎԱՆ, 22 ՀՈՒԼԻՍԻ, ԱՐՄԵՆՊՐԵՍ: Թուրքիան կդժվարացնի օտարերկրացիների համար Թուրքիայի քաղաքացիություն ձեռք բերելը՝ Եվրամիությանն անդամակցելու գործընթացով պայմանավորված։
Այդ մասին տեղեկացնում է «Արմենպրես»-ը՝ վկայակոչելով «Ռիա Նովոստի»-ին։
Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ Շվեդիայի անդամակցությունը ՆԱՏՕ-ին հնարավոր կլինի, երբ Թուրքիան անդամակցի ԵՄ-ին։ Ավելի ուշ ՆԱՏՕ-ի գլխավոր քարտուղար Յենս Ստոլտենբերգը հայտնել էր, որ Էրդողանը համաձայնել է որքան հնարավոր է շուտ փաստաթղթեր ուղարկել Թուրքիայի խորհրդարան՝ վավերացնելու Շվեդիայի՝ ՆԱՏՕ-ին անդամակցելու հայտը։ Շվեդիան, որպես Եվրամիության անդամ, խոստացել է հայտի վավերացման դիմաց աջակցել ԵՄ-ին Թուրքիայի անդամակցության գործընթացի ակտիվացմանը։
Ռուսաստանի Դաշնության նախագահի մամուլի քարտուղար Դմիտրի Պեսկովը նշել է, որ իրենք չեն ցանկանում Թուրքիային տեսնել Եվրոպայում, Անկարայում այդ հարցում չպետք է վարդագույն ակնոց կրեն։
Թուրքիայի ներգաղթային քաղաքականության մեջ ծրագրվում է նոր քայլ անել։ Այդ առնչությամբ ուսումնասիրություններ են կատարվում՝ ապաստան հայցողներին՝ հատկապես սիրիացիներին, Թուրքիայի քաղաքացիություն տրամադրելը դժվարացնելու համար։ Այսինքն՝ Թուրքիան այսուհետ ավելի զգույշ է լինելու ապաստան հայցողներին քաղաքացիություն տալու հարցում։ Դիվանագիտական աղբյուրները նշում են, որ ապաստանի հայցումը մուտքի արտոնագրի հետ կապված ամենակարևոր խնդիրներից է։
Թուրքիայի Ներքին գործերի նախարարության միգրացիոն վարչությունը ավելի վաղ հայտնել էր երկրում բնակվող մոտ 5 միլիոն միգրանտների մասին։ Գերատեսչության տվյալներով՝ 1169 բնակավայրերում օտարերկրացիների գրանցումն արգելված է։ Նախագահ Ռեջեփ Թայիփ Էրդողանն էլ հայտարարել էր, որ Թուրքիայի քաղաքացիները «շուտով փոփոխություններ կզգան անօրինական միգրանտների դեմ պայքարի արդյունքում»։