Լաչինի միջանցքը բացելու կոչից մինչև ԼՂ հումանիտար ճգնաժամի հարցով ելույթներ. Խանդանյանն ամփոփեց ԵԱՀԿ ԽՎ աշխատանքը

ԵՐԵՎԱՆ, 14 ՀՈՒԼԻՍԻ, ԱՐՄԵՆՊՐԵՍ: ԵԱՀԿ խորհրդարանական վեհաժողովն ամառային նստաշրջանի ընթացքում ընդունել է Հայաստանի պատվիրակության անդամների առաջարկները, Ադրբեջանին կոչ է արել դուրս բերել զորքերը Հայաստանի ինքնիշխան տարածքից, բացել Լաչինի միջանցքը:

«Արմենպրես»-ի հաղորդմամբ՝ հունիսի 30-հուլիսի 4-ը Կանադայի Վանկուվեր քաղաքում տեղի ունեցած ԵԱՀԿ ԽՎ-ի ամառային նստաշրջանի աշխատանքներն ասուլիսում ամփոփեց հայկական պատվիրակության ղեկավար Սարգիս Խանդանյանը:

Վեհաժողովի ընթացքում ընդունվել են մի շարք կարևոր որոշումներ, այդ թվում հաստատել է տարեկան փաստաթուղթը՝ Վանկուվերի հռչակագիրը: Այն ներառում է քաղաքական և անվտանգային հարցերին, տնտեսական, բնապահպանական և մարդու իրավունքների ու հումանիտար հարցերին վերաբերող, ինչպես նաև մի շարք այլ լրացուցիչ բանաձևեր: Հայաստանի պատվիրակությունը քաղաքական և հումանիտար հարցերով բանաձևերում առաջարկներ է ներկայացրել: Վեհաժողովը դրանք ամբողջությամբ ընդունել է:

«Մասնավորապես՝ վեհաժողովը կոչ է անում Ադրբեջանին դուրս բերել զինված ուժերը ՀՀ ինքնիշխան տարածքից, Արդարադատության միջազգային դատարանի որոշման համաձայն բացել Լաչինի միջանցքը, Հայաստանի և Ադրբեջանի ղեկավարներին ողջունում ու հորդորում է շարունակել բանակցությունները, նաև ողջունում է ԵՄ-ի և ԱՄՆ-ի միջնորդությունը՝ խաղաղության բանակցություններում: Կան անդրադարձներ նաև հումանիտար այլ հարցերի՝ ինչպես գերիների վերադարձի, մշակութային ժառանգության պահպանմանը և այլն»,-ասաց Սարգիս Խանդանյանը:

Կոմիտեի հումանիտար հարցերի բանաձևում ևս կա պարբերություն, որը կոչ է անում անմիջապես բացել Լաչինի միջանցքը՝ մարդկանց և բեռների անխախտ անցման համար:

«Վեհաժողովի մշտական հանձնաժողովը որոշել է, որ հաջորդ՝ աշնանային նստաշրջանը կկայանա Երևանում՝ նոյեմբերին: Սա առաջին անգամն է, որ ՀՀ-ն հյուրընկալում է ԵԱՀԿ ԽՎ-ի հիմնական նիստերից մեկը: ԵԱՀԿ ԽՎ-ն ամենամեծ տարածաշրջանային խորհրդարանական հարթակն է, կան 57 անդամ երկրներ, և կարևոր է մեր կոնտեքստի համար, մեր իրականության մասին խոսելու համար, Հարավային Կովկասում տեղի ունեցող զարգացումները մեր գործընկերներին ներկայացնելու համար»,-ասաց Խանդանյանը:

Սարգիս Խանդանյանն ընտրվել է ԽՎ-ի հումանիտար և մարդու իրավունքների հարցերով հանձնաժողովի փոխնախագահ: Պատմության մեջ առաջին անգամն է, որ ՀՀ ԱԺ պատգամավորը ընտրովի մարմիններից մեկում պաշտոն է զբաղեցնում: Կարևորն այն է, որ պաշտոնյան դրանով դառնում է միաժամանակ բյուրոյի անդամ, որը ԽՎ-ի հիմնական որոշումներ կայացնող մարմինն է:

Պատգամավորները նստաշրջանի ընթացքում հանդես են եկել ելույթներով, խոսել ԼՂ-ում հումանիտար իրավիճակի, Հայաստանի անվտանգային մարտահրավերների մասին: «Ոչ միայն մենք ենք խոսել, այլ նաև մեր եվրոպացի մի շարք գործընկերներ ևս իրենց ձայնը բարձրացրել են և փորձել ԽՎ-ի ուշադրությունը հրավիրել մեր տարածաշրջանի վրա»,-ասաց պատգամավորը: