Իրանը պաշտոնապես միացավ Շանհայի համագործակցության կազմակերպությանը
1 րոպեի ընթերցում
![Իրանը պաշտոնապես միացավ Շանհայի համագործակցության կազմակերպությանը](http://armenpress.am/resized/480/static/news/b/2023/07/1114686.jpg)
ԵՐԵՎԱՆ, 4 ՀՈՒԼԻՍԻ, ԱՐՄԵՆՊՐԵՍ: Շանհայի համագործակցության կազմակերպությունը (ՇՀԿ) հուլիսի 4-ին պաշտոնապես հայտարարեց միավորման անդամ երկրների շարքեր Իրանին ընդունելու մասին: Որոշումը կայացվել է կազմակերպության 23-րդ առցանց գագաթնաժողովում, որը նախագահում էր Հնդկաստանը։ Այդ մասին «Արմենպրես»-ը տեղեկանում է ТАСС գործակալությունից:
Իրանը դարձել է միջպետական միավորման իններորդ անդամը։ 2022 թվականի սեպտեմբերին Սամարղանդում ՇՀԿ-ի գագաթնաժողովում ստորագրվել էր Իրանի պարտավորությունների հուշագիրը՝ կազմակերպությանն անդամակցության նպատակով։
ՇՀԿ-ին Իսլամական Հանրապետության անդամակցության առթիվ Պեկինում կազմակերպության քարտուղարությունում տեղի է ունեցել Իրանի դրոշի բարձրացման հանդիսավոր արարողությունը:
ՇՀԿ-ն հիմնադրվել է 2001 թվականի հունիսի 15-ին Շանհայում։ Սկզբում կազմակերպության կազմի մեջ էին մտնում վեց երկրներ՝ Ռուսաստանը, Ղազախստանը, Ղրղզստանը, Չինաստանը, Տաջիկստանը և Ուզբեկստանը, 2017 թվականին նրանց միացան Հնդկաստանը և Պակիստանը: