Երևան-Գյումրի ավտոճանապարհին կցորդիչով բեռնատար է կողաշրջվել

ԵՐԵՎԱՆ, 23 ՀՈՒՆԻՍԻ, ԱՐՄԵՆՊՐԵՍ: Քաղաքացին հունիսի 23-ին, ժամը 12։13-ին դիմել է Արագածոտնի մարզային փրկարարական վարչության հրշեջ-փրկարարական ջոկատ առ այն, որ Երևան-Գյումրի ավտոճանապարհին տեղի է ունեցել ՃՏՊ՝ բեռնատար ավտոմեքենան կողաշրջվել է, կա վառելիքի արտահոսք։

Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատի մեկ մարտական հաշվարկ:

Ըստ աղբյուրի՝ պարզվել է, որ Երևան-Գյումրի ավտոճանապարհի 85-րդ կմ-ին MAN մակնիշի կցորդիչով բեռնատարը (վարորդ՝ Ա․ Մ․) դուրս է եկել ավտոճանապարհի երթևեկելի հատվածից և կողաշրջվել․ առկա է վառելիքի արտահոսք։

Նշվում է, որ փրկարարներն իրականացրել են ճանապարհահատվածի լվացման աշխատանքներ և տեղի ուժերի հետ հատուկ տեխնիկայի միջոցով ուղղել ավտոմեքենան։