Տեխասում 8 մարդու կյանք խլած զանգվածային հրաձգությունից հետո Բայդենը կրկին բարձրացրել է հարձակողական զենքի վաճառքն արգելելու հարցը
2 րոպեի ընթերցում
ԵՐԵՎԱՆ, 8 ՄԱՅԻՍԻ, ԱՐՄԵՆՊՐԵՍ: ԱՄՆ նախագահ Ջո Բայդենը Կոնգրեսին ևս մեկ անգամ կոչ է արել արգելել հարձակողական զենքերը: Սպիտակ տան ղեկավարի այս հայտարարությանը նախորդել էր հերթական զանգվածային հրաձգությունը ԱՄՆ-ում, որի հետևանքով 8 մարդ է մահացել, 7-ը՝ վիրավորվել: Այս մասին հաղորդում է «Արմենպրես»-ը՝ վկայակոչելով ԱՄՆ նախագահի գրառումը Twitter-ում:
Once again, Congress must send me a bill banning assault weapons and high-capacity magazines. Enacting universal background checks. Requiring safe storage. Ending immunity for gun manufacturers.
I will sign it immediately. We need nothing less to keep our streets safe.
— President Biden (@POTUS) May 7, 2023
«Եվս մեկ անգամ եմ կրկնում, Կոնգրեսը պետք է ինձ ուղարկի օրինագիծ, որով կարգելվեն հարձակողական զենքերը և մեծ տարողությամբ պահեստատուփերը, կիրականացվի կենսագրության համապարփակ ուսումնասիրություն, կպահանջվի անվտանգ պահում, վերջ կդրվի զենք արտադրողների անձեռնմխելիությանը: Ես այն անմիջապես կստորագրեմ», - գրել է Բայդենը:
Մայիսի 6-ին ԱՄՆ Տեխասի նահանգի Ալլեն քաղաքի առևտրի կենտրոններից մեկում 33-ամյա Մաուրիսիո Գարսիան կրակ էր բացել՝ սպանելով 8, վիրավորելով 7 մարդու: Հրաձիգը սպանվել է Ալլենի ոստիկանների կողմից: Ըստ CNN-ի՝ իշխանությունները դեռ չեն պարզել հանցագործության շարժառիթը: Քննիչներն ուսումնասիրում են հանցագործի հնարավոր կապն աջ ծայրահեղականների հետ:
Անցյալ շաբաթ Տեխասում ևս մեկ հրաձգություն էր տեղի ունեցել. հրաձիգը կրակ էր բացել բժշկական հաստատությունում՝ սպանելով 1, վիրավորելով 4 հոգու:
Gun Violence Archive (Զենքի կիրառմամբ բռնությունների արխիվ) հետազոտական կազմակերպության տվյալներով՝ այս տարվա առաջին հինգ ամիսների ընթացքում Միացյալ Նահանգներում տեղի է ունեցել արդեն 202 զանգվածային հրաձգություն: Կազմակերպությունը զանգվածային է որակում այն հրաձգությունները, որոնց ընթացքում կրակում են 4 կամ ավելի մարդկանց վրա՝ չհաշված հրաձիգին: