Դավիթ Մալյան փողոցի և Գայի պողոտայի խաչմերուկում բախված ավտոմեքենաներից մեկի վարորդը հոսպիտալացվել է

ԵՐԵՎԱՆ, 5 ՄԱՅԻՍԻ, ԱՐՄԵՆՊՐԵՍ: Ճգնաժամային կառավարման ազգային կենտրոնը մայիսի 5-ին, ժամը 14։02-ին ահազանգ է ստացել, որ Երևանի Ավան վարչական շրջանից Դավիթ Մալյան փողոց տանող հատվածում տեղի է ունեցել ՃՏՊ, կա տուժած, առկա է վառելիքի արտահոսք․ անհրաժեշտ է փրկարարների օգնությունը։

Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատի մեկ մարտական հաշվարկ և հատուկ նշանակության փրկարարական աշխատանքների իրականացման կենտրոնի փրկարարական խումբը։

Պարզվել է, որ Դավիթ Մալյան փողոցի և Գայի պողոտայի խաչմերուկում բախվել են «Subaru» (վարորդ` Հ. Հ.) և «Lada» մակնիշների ավտոմեքենաները․ վերջինիս վարորդն արգելափակվել է ավտոմեքենայում, վառելիքի արտահոսք չկա։

Ըստ աղբյուրի՝ մինչ փրկարարների կանչի վայր հասնելը «Lada» մակնիշի ավտոմեքենայի ուղևորին տեղի ուժերով դուրս են բերել ավտոմեքենայից։

Նշվում է, որ փրկարարները հոսանքազրկել են ավտոմեքենաները, «Lada» մակնիշի ավտոմեքենայի վարորդին դուրս բերել արգելափակումից և մոտեցրել շտապօգնության ավտոմեքենային։ Տուժածը հոսպիտալացվել է «Սուրբ Գրիգոր Լուսավորիչ» բժշկական կենտրոն։