Հրշեջները հրդեհ են մարել Երևանի Վանթյան փողոցում. կրակը տարածվել է հարակից երկու տների տանիքներ

ԵՐԵՎԱՆ, 15 ՀՈՒՆՎԱՐԻ, ԱՐՄԵՆՊՐԵՍ: Ճգնաժամային կառավարման ազգային կենտրոնը հունվարի 15-ին, ժամը 13։03-ին ահազանգ է ստացել, որ Երևանի Վանթյան փողոցի տներից մեկի մոտակայքում այրվում է կուտակած փայտ։

Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատի երկու մարտական հաշվարկ և օպերատիվ խումբը։

Հրդեհը մեկուսացվել է ժամը 13։55-ին, մարվել՝ 14։22-ին։

Նշվում է, որ տան բակում այրվել է մոտ 7 խմ կուտակած փայտ, հարակից երկու տների տանիքներից մոտ 18 քմ և ավտոտնակի տանիքից մոտ 3 քմ հատված։