5 րոպեի ընթերցում
ԵՐԵՎԱՆ, 21 ԴԵԿՏԵՄԲԵՐԻ, ԱՐՄԵՆՊՐԵՍ: Երբևէ մտածե՞լ եք ցանկացած սոցիալական ցանցում, մեսենջերում, մուտքագրման դաշտ ունեցող ցանկացած այլ հավելվածի միջոցով գումար ուղարկելու մասին: Text'nPayMe-ն թվային ստեղնաշարը տալիս է այդ հնարավորությունը. անհրաժեշտ է ընդամենը օգտագործել տեքստային կամ ձայնային համապատասխան հրաման և հաստատել գործարքը: Արթուր Կարապետյանի և Միհրան Բաբայանի ստեղծած ստարտափը չունի նմանօրինակը:
«Երբ սոցիալական ցանցերը սկսեցին վճարումների հնարավորություն տալ, հասկանում էի, որ շուտով բանկերը կարող են ընդհանրապես չլինել։ Ինձ համար բանկերը, որպես կառուցվածք, հին են: Հասկացա՝ ոչ թե բանկերը չեն լինի, այլ կստեղծվի սոցցանցային մոնոպոլ իրավիճակ, քանի որ դրանք մեր ամբողջ կյանքի տվյալներն ունեն, նաև կտիրապետեն մեր բանկային տվյալներին։ Պետք էր այս ուղղությամբ ինչ-որ լուծում մտածել ու 2019 թվականին կոնկրետ ծրագրային լուծմամբ սկսեցի թիմ հավաքել ու մշակել Text'nPayMe-ի գաղափարը»,- «Արմենպրես»-ի հետ զրույցում այս մասին պատմեց ստարտափի համահիմնադիր Արթուր Կարապետյանը։
Text'nPayMe-ն տրամադրում է մոբայլ ստեղնաշար ու Google Chrome զննարկիչի հավելում։ Մոբայլը սմարթֆոնների համար է, սակայն կա մարդկանց մեծ զանգված, որ դեռ սովոր է բանկային գործարքներն իրականացնել համակարգչով, հետևաբար իրենց համար մտածել ենք զննարկչի լուծումը։
Օգտատերն իր մոտ է ներբեռնում ծրագիրը, ինչպես, օրինակ՝ հայերենի ստեղնաշարն ենք ներբեռնում, գործարկում ու սովորական ստեղնաշարը դառնում է վճարային։ Քարտը կցելուց հետո հնարավոր է արդեն գործարքներ կատարել։ Ստեղնաշարը կարողանում է ֆինանսական տրամաբանական հրահանգները ընկալել որպես դրամ ուղարկելու գործողություն:
«Օրինակ՝ Instagram-ով ստեղնաշարի միջոցով կոնկրետ տեքստային կամ ձայնային հրահանգով հնարավոր է գումար ուղարկել։ Անհրաժեշտ է մուտքագրել, օրինակ, «ուղարկել 500 դրամ» սմարթֆոնի կոնտակտային ցանկում գրանցված մարդու անունը ու, եթե նա իր բջջային հեռախոսահամարով որևէ բանկային քարտ ունի, գործարքն իրականացվում է»,- ներկայացրեց ստարտափի համահիմնադիրը։
Հիմնադիրները մտածել են նաև անվտանգության մասին: Գումար ուղարկելը վերջնական հաստատելու համար պետք է մուտքագրել քարտի գաղտնաբառը կամ հաստատել բիոմետրիկ մեթոդով՝ մատնահետքի սքանավորման կամ էլ Face ID-ի միջոցով։ Այսինքն՝ բոլոր այն դեպքերում, երբ սմարթֆոնը գողանան կամ այլ անձ հասանելիություն ստանա դրան, փոխանցումներ կատարելը կանխված է։ Ընկերությունը որդեգրել է հենասյունային 2 քաղաքականություն:
«Zero-knowledge. մենք որևէ անձնական տվյալ մեզ մոտ չենք պահում: Մեր ընկերության կողմից մշակված անվտանգության համակարգը մշակվել է Epam-ի և ոլորտի լավագույն մասնագետների հետ»,- ասաց Կարապետյանը:
Ծրագրում կարելի է կցել մինչև 5 քարտ և ընտրել մեկ հիմնականը՝ փոխելու հնարավորությամբ։
«Յուրաքանչյուր տարածաշրջան ունի իր սահմանափակումները: Աշխատում ենք նաև կրիպտո արժույթների ուղղությամբ՝ ավելի կոնկրետ, հնարավորություն կլինի կցել որևէ կրիպտո արժույթի դրամապանակ: Հայաստանում բանկային փոխանցումները շատ տարածված են, մարդկանց մեծամասնությունը շարունակում է գումարը արտերկիր ուղարկելու հնարավորությունից օգտվել, դրա ամենահեշտ տարբերակը կլինի կրիպտո արժույթի միջոցով փոխանցումը»,- նշեց Text'nPayMe-ի համահիմնադիրը:
Թիմում այս պահին ունեն 9 մարդ։ Այն սկսել են ձևավորել 2022-ի փետրվարից, երբ ֆինանսավորում են ներգրավել։
Ստարտափը հաղթել է Buissup Global Forum-ում և դրանից հետո սկսել ներդրողների հետ բանակցությունների շրջանը: 2022-ի փետրվարի 28-ին ստացել են իրենց առաջին ներդրումը՝ 130 հազար դոլար։ Այդ ընթացքում դրամաշնորհ են ստացել նաև Բարձր տեխնոլոգիական արդյունաբերության նախարարությունից։
«Մասնակցել ենք Startup Wise Guys աքսելերատորին, ինչն ահռելի փորձ ու գիտելիք է տվել։ Անցել ենք Google-ի հետ համագործակցող ռումինական Next FinTech-ի ծրագիրը։ Դիմել ենք նաև մի շարք այլ աքսելերացիոն ծրագրերի, որոնք կենտրոնացած են ավելի շատ Միացյալ Նահանգների շուկայի վրա, օրինակ՝ Բերքլիի SkyDeck-ին, Y Combinator-ին, VISA-ի ծրագրին: Անցել ենք նաև 500 Global միջազգային աքսելերացիոն ծրագիրը, այնտեղ վերջնական կորոշենք մեր շուկա դուրս գալու հստակ ժամկետները»,- նշեց Կարապետյանը։
Կրիպտոարժույթով փոխանցումները դեկտեմբերին հասանելի կլինեն: Բանկային տարբերակով շուկա դուրս գալու մասին հստակ ժամկետներ չկան: Բանակցում են մի ընկերության հետ, որը հնարավորություն է տալիս դեմքը ճանաչելով իդենտիֆիկացնել մարդուն: Նպատակ ունեն գումար ուղարկելու գործընթացը ևս մեկ մակարդակով հեշտացնել:
Կարինա Տերտերյան