Դժվարությունները հավասարապես կիսելու սրտացավությամբ մնում եք մեր մեծ ընտանիքի անդամը. ԱԺ նախագահը՝ ՀՀ ազգային փոքրամասնություններին
1 րոպեի ընթերցում
ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ ազգային ժողովի նախագահ Ալեն Սիմոնյանը շնորհավորական ուղերձ է հղել ՀՀ ազգային փոքրամասնությունների օրվա առթիվ։
Ինչպես «Արմենպրես»-ին տեղեկացրին ՀՀ Ազգային ժողովից, ուղերձում նշված է. «Հայաստանի ազգային փոքրամասնությունների հարգելի՛ քույրեր եւ եղբայրներ,
Այսօր Հայաստանի Հանրապետության ազգային փոքրամասնությունների օրն է, որը Հայաստանի Հանրապետության տոնացույցը համալրել է մեկ տարի առաջ:
Ձեր ավանդույթներով, մեր երկիրը շենացնելու պատրաստակամությամբ եւ դժվարությունները հավասարապես կիսելու սրտացավությամբ եղել եւ մնում եք մեր մեծ ընտանիքի անդամը:
Փոքրաթիվ, բայց մշակութային բազմազանությամբ մեր երկիրը հարստացնող ազգային փոքրամասնությունների ներկայացուցիչները միասին ապրելու եւ համերաշխության լավագույն օրինակն են:
Շնորհավորանքներ եւ բարեմաղթանքներ Հայաստանն իրենց հայրենիքը համարող եւ սիրող մեր այլազգի քույրերին եւ եղբայրներին: Մենք գնահատում եւ հիշում ենք ձեր պապերի, զավակների սխրանքներն ու անձնազոհությունը, միշտ ձեր կողքին ենք, դրանում կասկած լինել չի կարող»: