Պոլսահայ երգչուհի Սիպիլը Հայաստանում ներկայացրեց «Երգն իմ թևերն է» ստեղծագործության տեսահոլովակը
3 րոպեի ընթերցում
«Արմենպրես»-ի հաղորդմամբ՝ Սիպիլը սեպտեմբերի 9-ին երկրպագուների դատին հանձնեց «Երգն իմ թևերն է» ստեղծագործության հիման վրա նկարահանված տեսահոլովակը:
Երգչուհին նշեց, որ իր նպատակն աշխարհում հայ երգը տարածելն է և խոստովանեց, որ առաջին անգամ է հայրենասիրական երգ կատարում, որը բավականին աշխույժ է: Սիպիլը մտավախություն է ունեցել, որ լիրիկական երգերից հետո գուցե երկրպագուները չհասկանան իր մատուցմամբ նոր ռիթմերը, սակայն ներկաների ծափողջույններից պարզ էր, որ ոչ միայն ընկալեցին, այլև սիրեցին:
Երգի հեղինակը Հասմիկ Հախվերդյանն է, գործիքավորողը՝ Վահան Նահապետյանը, հնչյունային ռեժիսորը Հմայակ Ռոստոմյանն է, տեսահոլովակի ռեժիսորը Ռազմիկ Գրիգորյանն է, օպերատորը՝ Մխիթար Սերոբյանը, ՀՕԳ Խորեոգրաֆիա` Էլիզա Պետրոսյանի, զգեստների նկարիչը Լիլիթ Մելիքյանն է:
Ստեղծագործական թիմը նշեց, որ իրենց միավորում է հայրենիքի արմատը լինելու ցանկությունը: Նրանք հույս ունեն, որ թեթև ժանրի երաժշտության միջոցով հայրենասիրությունը մեծ տարածում կգտնի, կմտնի ամեն հայի օջախ, և այդ վեհ գաղափարը սերմեր կտա:
Միջոցառման հյուրերից էր Եղիշե Չարենցի անվան գրականության և արվեստի թանգարանի տնօրեն Վահագն Սարգսյանը: Նա հոլովակը դիտելուց հետո շեշտեց, որ երգը լավատեսական է: «Մենք սիրում ենք մեր հայրենիքը, սիրում ենք նրա գույներն ու բույրերը: Վանքերն ու հեթանոսական տաճարները մեզ կրկին տանում են դեպի մեր արմատները, հիշեցնում են, որ մշակութային ազգ ենք»,-ասաց նա:
Սարգսյանը վստահություն հայտնեց, որ կգա օրը, և նոր սերունդը կրկին կանդրադառնա արվեստին, քանի որ մշակութային հայն է հայության կրողը: Նա հիշեց Արամ Խաչատրյանին, Շառլ Ազնավուրին՝ նշելով, որ նրանք մի ամբողջ հայրենիք էին ու կարողանում էին ներկայացնել հայի ինքնությունն ու մշակույթը: «Այդպիսին է նաև Սիպիլը, որին մեծ հաջողություններ եմ մաղթում»,-եզրափակեց նա:
«Երգն իմ թևերն է» ստեղծագործությունը գրվել է հատուկ Սիպիլի համար և արտացոլում է երգչուհու գաղափարներն ու նպատակը՝ հայ երգի սփռմամբ հայ ժողովրդի անցյալը, ներկան ու ապագան աշխարհին ներկայացնելը։ Վերջին տարիներին երգչուհին հայտնի է իր թեմատիկ երգերով, որոնք ամփոփել են մեր ազգի ցավերն ու պատմել հային պատուհասած աղետների մասին։ Այս անգամ երգը կհիշեցնի հային, թե որքան վաղուց է սկսել իր երգը թևածել աշխարհում և թե որքան հեռու են տանում ճանապարհները, որ պիտի անցնի հայը։