2 րոպեի ընթերցում
ԵՐԵՎԱՆ, 17 ՓԵՏՐՎԱՐԻ, ԱՐՄԵՆՊՐԵՍ: Բրազիլական Ռիո դե Ժանեյրո նահանգի Պետրոպոլիս քաղաքում տեղացած հորդառատ անձրեւների հետեւանքով զոհերի թիվը հասել Է 104-ի, նրանցից ութը երեխաներ են: Այդ մասին հաղորդել Է G1 նորությունների պորտալը, տեղեկացնում Է «Արմենպրես»-ը:
Ավելի վաղ հաղորդվել Էր 94 զոհվածի մասին:
«Պետրոպոլիսում զոհվածների թիվը 104-ի Է հասել տեղական ժամանակով փետրվարի 16-ի ժամը 23:30-ի դրությամբ (Երեւանի ժամանակով փետրվարի 17-ի 06:30)»,-ասվում Է պորտալի հաղորդագրության մեջ:
Ավելի քան 50 տուն ավերվել Է: Ավելի վաղ հաղորդվել Էր, որ քաղաքացիական պաշտպանության ծառայություններին հաջողվել Է փրկել 24 մարդու: Եվս 35 մարդ համարվում Է անհետ կորած: Փետրվարի 8-ին հորդառատ անձրեւներն ուղեկցվել են սողանքներով եւ հեղեղումներով:
Ավելի քան վեց ժամում 260 լիտր տեղումներ են գրանցվել մեկ քառակուսի մետրի վրա: Դա շատ ավելին Է, քան սովորաբար փետրվար ամսին լինում Է Բրազիլիայի այս տարածաշրջանում:
Ռիո դե Ժանեյրոյի նահանգապետ Կլաուդիու Կաշտրուն փետրվարի 16-ին ժամանել Է տեղատարափներից տուժած տարածաշրջան: Ավելի վաղ նա ստեղծված իրադրությունը գնահատել Է որպես «պատերազմին մոտ»:
Փետրվարի 16-ին անցկացված մամուլի ասուլսում նա հայտարարել Է, որ տարածաշրջանը պատուհասած անձրեւն «ամենահորդառատն Է դարձել 1935 թվականից ի վեր», հաղորդել Է ՌԻԱ Նովոստի գործակալությունը: