Այս տարի մեծ տեղ ենք տալու երիտասարդներին. Հակոբ Սերոբյան 

ԵՐԵՎԱՆ, 20 ՀՈՒՆՎԱՐԻ, ԱՐՄԵՆՊՐԵՍ:Հայաստանի մարմնամարզության հավաքականն ընդլայնված կազմով ուսումնամարզական հավաք կանցկացնի Վրաստանում:

«Արմենպրես»-ի հետ զրույցում այս մասին հայտնեց Հայաստանի հավաքականի գլխավոր մարզիչ Հակոբ Սերոբյանը: «Ուսումնամարզական հավաքին կմասնակցեն թե մեծահասակները, թե երիտասարդները: Այս տարի մեծ տեղ ենք տալու երիտասարդներին: Մեր հիմնական նպատակն աշխարհի գավաթի խաղարկություններին մասնակցելն է, որոնք հաջորդում են միմյանց»,- ասաց Սերոբյանը: Մասնագետի խոսքով` փետրվարի 22-ին ընտրանին առաջատար մարզիկներով կմեկնի Գերմանիա` աշխարհի գավաթի խաղարկությանը, որին կհաջորդեն Կատարի և Եգիպտոսի մրցափուլերը:

«Օլիմպիական խաղերից հետո աշխարհի առաջնության մասնակցության ընթացակարգւ փոխվել է, և հիմա պետք է, որ աշխարհի գավաթի խաղարկության փուլերում միավորներ հավաքենք»,- շեշտեց նա:

Ուսումնամարզական հավաքը կմեկնարկի հունվարի 28-ին: Հավաքականը 14-օրյա հավաք կունենա Թբիլիսում: