1 րոպեի ընթերցում
ԵՐԵՎԱՆ, 17 ՆՈՅԵՄԲԵՐԻ, ԱՐՄԵՆՊՐԵՍ։ Հայաստանը ունի բավարար արյան պաշար բոլոր անհրաժեշտ դեպքերի համար։
«Արմենպրես»-ի հաղորդմամբ՝ լրագրողների հետ զրույցում այս մասին ասաց Առողջապահության նախարար Անահիտ Ավանեսյանը` անդրադառնալով Ռ. Հ. Յոլյանի անվան արյունաբանական կենտրոնի հայտարարության, որում նշվում էր արյան դոնորների շտապ անհրաժեշտության մասին։
«Ժամանակ առ ժամանակ նաև հայտարարություններ են լինում, որպեսզի քաղաքացիներն ավելի ակտիվ կերպով գան և դոնոր հանդիսանան։ Ռ. Հ. Յոլյանի անվան արյունաբանական կենտրոնը նման հայտարարություններ մշտապես անում է։ Վերջին շրջանում կորոնավիրուսի դեպքերի աճով պայմանավորված՝ ունենք դոնորության նվազում, ուստի ևս մեկ անգամ հայտարարությամբ հորդորում են քաղաքացիներին արյուն հանձնեն»,- ընդգծեց Ավանեսյանը։
Նախարարը վստահեցրեց՝ արյան պաշարների հետ կապված խնդիր չունեն, այն պարբերաբար համալրվում է։